謝安琪（Kay）一連四場演唱會前晚喺紅館舉行首場演出，一向敢言嘅Kay全晚總共唱咗23首歌曲，但卻罕有地封嘴，未有同觀眾講過一句說話，連招呼都冇打。而開場前，紅館停車場外就有大批防暴警察經過。
玻璃浴室
今次Kay嘅演唱會以三面台設計，加入咗大量視覺效果，台上有橫跨整個舞台嘅巨型LED屏幕，配合唔同嘅藝術畫面。其間，屏幕播放一條Kay殺死麥浚龍（Juno）嘅短片，片中身穿白色長裙嘅Kay追住Juno，仲用刀仔插死對方，之後滿身鮮血嘅Kay企起身離開，非常血腥。
其後Kay唱出《人妻的偽術》，台底升起玻璃房浴室，Kay走入去獻唱《一個女人和浴室》，之後又戴上一個巨型面紗出場，4歲半開始學琴嘅佢更彈出歌曲《You're in Love》。
古仔訂婚
古天樂以財經主播身份出現喺間場短片，當佢講到近期跌市累積蒸發一萬億港元時，現場觀眾即大叫「攬炒」，片段中見古仔報道各國貨幣時非常唔順暢，最後佢仲話：「我啱啱訂咗婚，晚安。」惹來全場譁然。雖然古仔最終冇現真身，但就被投射喺舞台上嘅玻璃浴室入面，同Kay一齊演出《（一個男人）一個女人和浴室》。之後Kay唱出多首大家熟悉嘅歌曲如《你們的幸福》、《獨家村》同《年度之歌》等，贏得觀眾熱烈掌聲。
撰文：馮仁昭