世盃外亞洲區第二圈A組，首場作客5:0大破馬爾代夫嘅中國隊，禮拜四返到廣州主場天河體育場，面對世界排名195位嘅關島，靠射手楊旭上半場已上演「大四喜」，半場領先6球嘅情況下全場大勝7:0。好記性嘅球迷可能會記得，05年東錦外港足亦曾15:0大破關島，其中「陳七」陳肇麒個入攻入七球，被外界稱為關島殺手。實力遠勝對手嘅國足，開賽六分鐘楊旭就喺禁區勁射破網領先；17分鐘有「武球王」武磊連過幾關勁射破網。之後就輪到今場主角楊旭，喺19、24同31分鐘入波，踢咗半粒鐘左右就上演大四喜，加上吳曦上半場補時頭槌破網，結果國足半場派足半打光蛋。踢到75分鐘，入籍兵艾克森門前執雞成功，幫國足湊夠7:0完場，世盃外兩戰全勝位居A組榜首。