現年43歲的陳山聰近日可謂雙囍臨門，首次擔正男一的劇集播出以來口碑佳，而他更將於下月1日迎娶拍拖五年的圈外女友Apple，昨日他們公開早前在法國拍攝的婚紗相，相中一對新人臉上流露出幸福和快樂。
好友助慳荷包
陳山聰解釋選擇到法國影婚照原因，他說：「其實我同太太拍拖呢五年入面，我都冇為佢做過啲乜浪漫嘅事，𠵱家終於要結婚喇，所以我好想帶佢去一個好浪漫嘅地方影相補數，希望畀到太太有個美好回憶。法國係一個我相信大部份女仔都會鍾意嘅地方，加上太太未去過，所以好想同佢喺呢度，影一輯靚靚婚紗相，成為我同佢之間一個最美好同難忘嘅回憶。」
近年愛上跑步的陳山聰練得一身弗爆身形，其中一款婚照中他穿上白色背心大晒麒麟臂，穿上露肩婚紗的Apple亦美艷動人。陳山聰感激一眾兄弟姊妹在拍攝婚紗相中出力幫忙，令他可在有限的預算中做到最佳、最滿意的效果：「攝影師係幫袁偉豪影寫真嗰位Frankie，Apple婚紗上嘅喱士係喺法國選購，至於我套禮服係買，好彩有蘇永康同佢太太仗義幫忙，我先得到呢套咁有型嘅禮服。」至於婚禮預算，陳山聰說：「呢個美好回憶係唔可以用錢去衡量，只要係能力範圍內，最重要令太太開心。」他透露婚禮以簡單形式進行，最重要是家人及最好的朋友在場與他們分享喜悅。
生小朋友隨緣
不過，婚照中頻頻見Apple側身企，又以陳山聰的身軀遮遮掩掩，其中一張黑白婚照中，Apple穿上長袖婚紗襯陳山聰深色西裝，Apple更用左手摸肚，是否暗示有喜？陳山聰昨接受傳媒訪問時否認：「梗係唔係，唔好話佢肥，佢好傷心，你哋睇慣Angelababy呀，所以覺得佢（腰）粗囉，佢只係擺隻手喺肚度。」會否考慮生小朋友？他說：「隨緣，聽天安排，如果個天畀一個我哋，我哋都好樂意去接受。」
採訪：嵐山