今次逆權運動中最早燃起硝煙的港島，6.9的百萬人和平遊行換來6.12警方暴力鎮壓連珠亂發催淚彈，就連沉默多年的一班和理非中佬同樣「佛都有火」，漸漸升級成勇武「衝衝漢子」，走進烽煙四起的戰場。
有衝衝大叔為保護青少年，在衝突中不惜冒險站在最前線捱煙擋彈；有和理非中佬縱被捕仍堅持支援勇武少年誓不割席；也有年近半百大叔捐出近半月薪，買防具及為年輕人做「哨兵」。這班衝衝大叔無懼警暴，誓要與年輕人攜手抗爭，走到最後。
記者：林穎嵐
攝影：徐雲庭 林熊
「老竇」擋子彈 護落單青少年
「我要畀佢哋知，我會喺前面同你哋齊上齊落！」35歲的Roy在過去幾個月都一直在銅鑼灣、灣仔一帶的「戰場」企在前線揸盾擋彈。7月份西環一役更成為他個人的關鍵轉捩點，全因自此他成了「衝衝老竇」，身後多了一群十多歲的「仔仔女女」。由那時起，每次上場他都視「執仔執女」為己任，以爸爸的身份出錢出力，保護前線落單的年輕人，即使催淚彈在臉旁橫飛也不改其志，只因Roy早已視一眾年輕人是「一家人」。被仔女們稱作「老竇」的他坦言身在這場瀰漫白色恐怖的抗爭，早預料要犯法甚至可能被捕。
開放屋企收留「仔女」
Roy在今次運動展開初期，原本是獨行俠，及至7月份西環一役後，他首次展開「執仔」大行動。「當日上午打西環，我去到頭二、三排，頭排見到有三個妹妹，望落去紮住條辮仔笠住個黑色手術口罩，嗰陣我戴住個N95、普通3M口罩、拎住個職工頭盔。嗰時我都咁嘅打扮，但嗰三個妹妹只係戴口罩，乜都冇，佢哋最多都係20歲嘅妹妹。我諗都唔諗，除咗頭盔笠落其中一個妹妹度，當時佢望住我，我話『我畀你嘅，去我後面，小心啲』，我一擰轉面催淚彈已經到，有一粒直頭喺我嗰時戴嘅3M眼罩擦過，成個罩90度歪咗，跟住跌喺我腳底。」
西環一戰那個畫面一直在Roy心中盤旋，由當時起，他每次上陣都總會找到些落單小朋友，「其實呢啲畫面，每一次出嚟都見，7.28喺元朗見到好多更加細……自己行得後會諗，究竟係我懦弱，還是佢哋太唔識死？所以更需要一班人嚟保護佢哋……我畀自己一個宗旨，一定要佢哋走得甩，救到人，返到嚟！」
這位衝衝老竇既為一群戰場仔女憂柴憂米，更把自己的家讓給被藍絲父母趕出街的仔女作留宿和開會基地，更在他們被捕後張羅律師營救。Roy坦言自己與部份仔女近月都因為與家人政見不合而離家出走，大家都暫居於秘密基地。就在中秋節前夕，他帶同月餅到基地，與仔女們相約好9月份要「一家人」團圓吃月餅，「但最終有仔喺8.31俾人拉咗，拉完大家都唔敢見大家，結果，都係唔齊人。」
只願他們平安回家
從事廣告界的Roy，本來於廣告公司工作，現已「被辭職」轉而成為自由身工作者，收入大減，經濟有壓力，但他依舊自掏腰包為「仔女」籌錢購入裝備如口罩等，他笑言有時為免他們「裸裝」上陣，惟有自己掏荷包，只願他們每次都平安回家。Roy的團隊現已由高𥧌期約40人驟減至約20人，當中有人被捕，有人選擇停戰。記者問他何以這麼危險仍堅持落場？阿Roy答得坦然：「去到呢刻，爭取緊啲正確嘅嘢，無論點樣都係值得！」