元朗7.21白衣人無差別恐襲，建制派立法會議員何君堯「聲名大噪」，唔少組織機構想同佢割席，八方近日翻查議員利益申報，發現佢已經唔係香港足球總會嘅非受薪董事；再睇返足總網頁，何君堯原來亦已經冇做法律事務委員會主席，甚至所有委員會都冇何君堯份，唔知係咪7.21事件令佢緣盡足總？
7.21後變鬼見愁
何君堯做足總董事已有一段時間，早喺2015年、即係佢成為立法會議員前一年嘅足總董事會選舉，佢都成功連任，任期至今年。而何君堯嘅最新利益申報，原來8月時表明冇做足總董事。再睇埋足總網頁，原來早喺今年6月底嘅足總董事會選舉中，何君堯已經冇再參選，任期滿咗就自然退位，事實上足總5月發出嘅候選人名單，亦已經見唔到何君堯個名。
講真吖，7.21事件後，連傑志球隊喺多年前幫過何君堯助選都被人拎返出嚟講，搞到傑志會長伍健要出嚟話同何君堯冇私交，其後有球迷仲話足總唔應該畀何君堯做足總嘅法律事務委員主席。同何君堯有啲距離，可能都令人唔會「好困擾」。