【娛樂人物】29歲林泳淘2012年參選港姐晉身娛樂圈，一出藝訓班便加入《東張西望》做主持，一做七年。今年3月，林泳淘因為反對修訂《逃犯修例》，在Ig出post呼籲上街遊行，被封「民主女神」，怎料種下禍根，上月底突然收到公司電話，即時解約。對「民主女神」稱號，她受之有愧，雖然失業，但她強調要本着良心做事，對學生被打，她心痛嗚咽︰「打佢哋就好似打自己一樣咁痛。」
撰文：嵐山
攝影：林德雄
林泳淘由出post呼籲遊行到被提前解約，沒料到影響如此大，她日前受訪時說︰「冇諗過咁大件事，我日日睇新聞，睇見呢個條例，好驚喎，有幾點好可怕，尤其其他國家嘅人嚟香港，都可能會被帶走一啲佢哋所謂嘅政治罪犯。以前香港人政治冷感，既然我睇到就希望推吓大家，但冇話要針對任何嘢，有人話你係呢邊（黃絲），但香港人從來冇覺得反條例就等如港獨，大家只想要一個自由安全嘅香港。」
良心最後把關
欲言又止的林泳淘，表示受訪前朋友都勸她避談政治，但她希望本着良心做事。提到前線十餘歲的勇武派，她眼泛淚光說：「嚟到𠵱家，成件事係好心痛，你見到好多新聞，好細個小朋友俾人打，令我覺得只能默默幫人，唔可以出面同人講，因為人哋要遊行或者做任何嘢，係人哋嘅選擇，唔應該出自我把口，如果人哋有乜嘢事，我覺得呢件事係唔啱。」幾個月來，每晚有抗爭都會令她徹夜難眠：「因為我會睇通頂，每次都問點解，良心係人類最後嘅把關，我只可以咁講。」
被外界封《東張》民主女神，林泳淘坦言受之有愧：「呢件事上我冇做乜嘢，只係開頭叫人留意，同朋友share吓，但冇真正做到好似佢哋前線咁，佢哋先至係真正努力嘅人，自己付出嘅努力遠遠追唔到佢哋，唔好咁嗌我，真係自愧不如。」她只能叫大家「Be Water」：「我唔會批評前線啱定錯，但面對防暴喺對面，咁不如你哋走啦，我真係好心痛，睇住live，打佢哋就好似打自己一樣咁痛。」
成為失業大軍，林泳淘不擔心將來冇工開，反而安於天命：「Touch wood真係冇嘢做，咪去7仔打工囉，餓唔死。」自言非大富之家，幸有家人疼錫，還有一位拍拖12年的初戀男友：「我打畀佢話我俾人炒咗，佢話︰『天呀，咁我今次真係要養你』，我話『係呀』，哈哈。」養唔養得起？我說：「平有平養，貴有貴養啦，我冇所謂。」林泳淘自爆是女追男：「當年考完中五，去聖誕舞會見佢好純，唔係靚仔，但一個人坐喺度唔出聲好可愛，就撩佢玩，之後發覺佢好好。我喺佢身上學到好多嘢，拍拖咁耐從未見過佢發脾氣，或者講人壞話。」初入行時她怕fans失望，不公開戀情，現在也希望保護男友：「始終係圈外人，我出街好驚俾人認到，反而佢冇所謂。」
直認被問過價
除了民主女神，擁有33D豐滿上圍的林泳淘也有《東張》咪神封號，她苦笑說：「拍《3日2夜》着泳衣出鏡，𠵱家諗番係咪黑歷史。」自言是保守派，當年參選港姐也是半推半就：「媽咪係傳統女人，但佢竟然話：『冇所謂，咪俾人睇一次』。當年屋企人想我去英國讀書，咁啱嗰年係去英國拍外景，免費去英國旅行，賺咗啦，好市儈。」對於落選港姐楊斯雅早前網上爆圈中女星賣淫或被包養，林泳淘承認收過問價短訊：「試過話30萬同你食餐飯，唔應就一路加上去！」雖然突然不被續約，但林泳淘已謀後路，除了與《東張》好姊妹利穎怡和尹詩沛齊齊開網店賣首飾，又接了歐錦棠監製的ViuTV新劇《打天下》，另闢天空。
