曼聯自從上輪聯賽輸畀紐卡素後，聯賽8場只得9分，領隊蘇斯克查帥位危危乎。最近有報道話前祖雲達斯主帥艾基利可能會接掌紅魔領隊一職，但就要求曼聯要未來幾周內畀佢上任，為免太遲救唔番。另外，有傳曼聯已經同祖記嘅文迪蘇傑達成口頭協議，將會喺下年一月簽入呢位喺上季同艾基利合作嘅克羅地亞前鋒。
艾基利催曼聯快炒蘇B
曼聯今季表現欠佳，周日仲輸埋畀紐卡素，開季8戰只得9分，創下近30年曼聯嘅聯賽最差開局，令到領隊蘇B備受壓力。國際賽後曼聯仲要對榜首利物浦，有咩差池蘇B隨時會俾球會開刀。呢幾日已經有傳曼聯搵定接班人，傳過想搵RB萊比錫少帥尼高斯曼，亦有消息指想搵前祖雲達斯教練艾基利接手。有報道話呢位曾帶領祖記意甲五連霸嘅教練都有意教紅魔，不過就有一個條件，就係要喺未來幾星期內上任，希望盡快拯救曼聯，如果紅魔安排佢12月先上任，佢就冇興趣教咁話。
另外，曼聯喺英超轉會窗最後一日賣咗盧卡古俾國際米蘭，搞到隊內無一個正宗中鋒。近日有傳祖記前鋒文迪蘇傑已經同曼聯達成口頭協議，會喺明年一月加盟紅魔。之前已經傳過呢位33歲前鋒會喺今夏加盟曼聯，但最終留喺祖記，佢今季未為祖記上陣過，亦落選咗球隊歐聯大軍名單。假如艾基利真係教曼聯，佢同文迪蘇傑就可以再續前緣，呢位前鋒應該會有多啲上陣機會。