效力美職聯芝加哥火燄嘅德國中場舒韋恩史迪加，因無法帶領球隊晉身季後賽，禮拜二喺常規賽結束後向外界宣佈，正式結束17年嘅職業生涯。
𠵱家35歲、花名「小豬」嘅舒韋恩史迪加，喺拜仁幕尼黑一隊上陣長達13季後，2015年改投英超曼聯，17年再轉戰美職聯芝加哥火燄踢咗3季。職業生涯為拜仁贏過八次德甲冠軍，更係呢支德甲班霸喺12/13年球季成為三冠王成員之一，亦係14年德國贏世盃冠軍嘅功臣，效力曼聯期間亦曾贏過英足盃冠軍。
舒韋恩史迪加喺帖文中講到：「各位球迷，係時候喺今季後結束我嘅職業生涯，我想多謝所有拜仁、曼聯、芝加哥火燄及德國國家隊嘅隊友，你哋帶畀我難忘嘅時刻，當然我亦要多謝我嘅太太同埋屋企人嘅支持，要講再見難免會令我有所懷念，但我會展望未來等待新嘅挑戰，我會繼續我對足球嘅忠誠，感謝我哋一齊經歷嘅時刻，你哋將會喺我心中永遠佔有位置。」