一個簡單決定，有時正正改變你一生。
45歲的翁嘉穗，97年在加拿大讀完大學，無意間回港選香港小姐，成為四料冠軍兼改變一生。轉眼二十多年過去，身材樣貌沒大變動，身邊大仔Jason已經19歲，更試過被錯認是男友，翁嘉穗的幸福人生令人羨慕，近年開始做慈善，今年做慧妍會長報效港姐及社會，「改變我人生有三件事，就係選港姐、嫁畀我老公，同舊年做東華總理。」
撰文：林妙萍
攝影：周樂恒
翁嘉穗當年港姐一卸任，沒入無綫拍戲做演員，反而極速嫁給了七海化工集團老闆鄔友正，退出幕前更生了兩個兒子。這天她一身露膊短裙弗爆在上環受訪，之後再趕到東華三院總局，接在總局做暑期工的大仔鄔謨雲（Jason）放工。
獎學金讀碩士
「老公當時係港姐活動贊助商，我當選幫品牌拍廣告，咁樣開始，佢冇求婚，嗰時好簡單。」鄔友正年紀比翁嘉穗大20年，「我鍾意佢叻，個人好聰明，可以lead到你。我哋都好鍾意食，都食得健康嘅，但佢食嘢有時好誇張，試過有次我哋喺屋企睇電視，佢食雪條，一直食，我奇怪點解可以食咁耐，打開雪櫃一睇，原來佢食咗一整盒，一盒八條一晚食晒，好誇張。」翁嘉穗除了湊仔，還會陪老公出差，更剛收到獎學金準備讀藝術系碩士，「呢個係當年想做，但冇做到嘅事。老公一定支持啦，有獎學金，我自己都開心啦。」兩人今年結婚剛好二十年，嘈交總會有，「我唔及佢，我唔同佢嘈，佢好長氣，嘈交時講嘢好快，好大聲，我試過反駁佢，佢會不停咁講幾日，不斷輪迴又輪迴地講，我怕煩，放棄喇。」
兩人的紅線，由翁嘉穗參選港姐、遠在加拿大溫哥華開始，剛讀完大學經濟系，投出許多求職信後，最快回覆的竟是香港小姐的入圍通知，「細細個經常有人叫我選，我初頭唔係太大興趣，咁啱識到李嘉慧了解咗，覺得又幾好喎，有來回機票，又有得直接入總決賽，咪當返嚟玩囉，一返就返到𠵱家喇。」回想當日，她最記得第一輪選就連得兩個獎，台上反應呆了，之後淡淡定，成為1997年四料冠軍，「后冠我有兩個，一個係真嘅，放喺保險箱，另一個係仿製品，供日常出活動用。朋友上親嚟我屋企，都要戴吓玩。」
翁嘉穗育有兩個兒子，19歲大仔Jason未成年已成為舉重冠軍，兩度打破世界紀錄；她在41歲高齡產下細仔鄔謨風（Kasper)，兩兄弟感情好好。「媽咪一向係個好nice、好關心人、好為我着想嘅母親，同埋唔知點解，由細到大，媽咪嘅樣子冇變，可能變得更靚㖭，騷到畀我睇，好嘅母親應該係點樣，如果我想搵一個好太太，我知點樣搵。」
做總理去義莊
大仔已升讀大學，有時間重投社會，翁嘉穗近年做公益善事，去年應王賢誌之邀，入東華做總理，她更視為改變人生的第三件事，「舊年做總理，東華真係令我大開眼界，東華係全港最大嘅NGO，有醫院、寺廟、教育服務，做總理唔係淨係捐錢，好多嘢做，一年如果去足，有四百幾個活動、會議，變相每一日都至少一單。」抽時間難？籌款難？原來，另一種體驗仲難，「最難係參觀東華義莊，因為我好驚，有啲body仲喺度，講緊有啲一百年前，記得有一對總理夫婦，因為冇子女遺體就放喺義莊，嗰日我哋去拜祭佢哋，我一行入去，就呆一呆，後來同隔籬講，我可唔可以同你調位企，我唔想正面望到。」今年，港姐出身的她決定返回慧妍雅集出任會長，「今年想做藝術發展方面，因為香港好多人好有天份，但冇渠道發展，希望我哋可以籌到錢，做啲獎學金。」
自認嚴重貪靚
對比1997年選港姐，翁嘉穗的身形樣貌的確變化不大，原來二十多年來都保持同一磅數110磅，「哈哈，我貪靚程度都好嚴重㗎，朋友都話我好犀利，貪靚十分滿分嘅話，我都有八、九分。」
翁嘉穗每晚都敷面膜，每朝起身飲兩杯清水，常做運動，和老公打乒乓波，閒時跳舞、瑜伽、游水，「同食都有關嘅，我本身唔太食零食、雜食，鍾意食有機，唔食白米、食brown rice、藜麥等。」
更多精采時尚內容，盡在 http://add.appledaily.com。