今日十月十日，係咩嘢日子？可能已成為香港禁忌，左丁山兒童時代，十月十日到處可以見到青天白日滿地紅旗幟飄揚，所屬學校係商會創辦，所有理監事早上齊集學校操場舉行升旗禮，高唱「三民主義，吾黨所宗」影響所及，左丁山等小學生都識唱埋一份；姨丈住在石硤尾徙置區，整個石硤尾都係青天白日滿地紅，1956年雙十暴動，由此而起。
俱往矣，左丁山間學校已執笠多年，學校主辦單位嘅商會就愈來愈有錢，理監事會成員早已改向五星紅旗致敬，高唱：「起來起來，不願做奴隸的人們」（呢幾句其實幾啱今日之香港示威者高唱，踏着警察的槍彈前進）。自學校執笠後，左丁山幾十年冇返過商會，唔知當年理事長監事長去台北慶祝雙十節，晉見蔣介石、陳誠的相片有冇畀後來者清洗咗呢。
新亞書院自1949年創校（錢穆揀十月十日舉行儀式），每年在十月十日掛青天白日旗，直至1969年港英政府大力向中文大學及新亞施壓，新亞在1969年十月十日最後一次掛旗，自此之後，左丁山再冇在書院見過此旗在學校飄揚，點解呀，你懂的。
今年今日，有乜特別喎？居然係中華人民共和國副總理／國家主席習近平特使劉鶴率領貿易談判代表團在華盛頓與美國展開第13輪談判。中美貿易戰開展咗一年半，關稅戰不斷升級，至今談判毫無結果，卒之弄得美國製造業PMI跌破50點，引起衰退恐懼，美國股市自歷史高位回落，而中國經濟增長由以前之保8、保7，至到依家講保6，大家知道係乜嘢一回事，今年中國汽車銷量下跌，即食麵銷量回升，你估係乜嘢跡象？人民日報話中國即食麵銷量回升（按即食麵銷量自2014年下滑，2018年回升）係因為質量改善，高端即食麵銷量好之故，但人民少買新車，多吃高價即食麵，無論點睇，都係節省金錢之舉，慳番作儲蓄用途，背後原因就係怕經濟不景。
中美貿易戰已初現兩敗俱傷局面，特朗普近日居然仲將事件複雜化，聲稱可能要求中國調查拜登兒子（Hunter Biden）在中國有無涉貪，雖然佢立即澄清話貿易談判唔會與拜登事件一齊講，但已足夠啟人疑竇，假如美國看似讓步，民主黨眾議院一定唔會收貨，恐怕特朗普與習近平有秘密交易也。中國從來都將政治與經濟貿易混為一談，絕不分開，特朗普為打擊政敵居然出到聲要中國幫手，你估中國唔會乘機開價，趁特朗普病，攞番啲着數？第13輪談判比以前更複雜，投資者唔好太樂觀。