前日資訊系統部高級警司陳志勇喺記者會高調宣佈重推「篤灰」熱線號碼5333 3103，仲有微信WeChat、LINE同SMS，之前因為俾WhatsApp封咗，所以冇包括WhatsApp。
冇申請官方戶口
話就話冇咗WhatsApp，應該唔會再出現俾人block嘅情況，但估唔到唔使一日LINE已經爆咗用唔到，點解？因為呢位資訊系統部阿Sir連申請個官方account都冇，以個人account名義申請嘅警察熱線，只得500個加好友名單好快就爆咗，唔再接受加入申請，不過唔緊要，已經有好多網民一齊加咗LINE，除咗「篤灰」佢哋個「篤灰」熱線，仲舉報咗好多「暴徒」。
正所謂識睇睇留言，黃之鋒以身作則做個好市民，噚晚喺facebook呼籲大家幫手舉報「暴徒」，結果唔少人幫手舉報仲cap埋圖，證實阿Sir「已讀」，證明真係有效，不過睇真啲，原來好多舉報都係一啲片段，就係一大班全副武裝嘅black object，撳住一班年輕人喺地下拳打腳踢，當然唔少得名曲《肥媽有話兒》啦，雖然阿Sir冇覆，但見到訊息狀態係已讀，我諗大家嘅舉報阿Sir收到晒喇！
李八方