反送中運動之所以成功衝出香港、登上國際舞台，除咗有賴一眾連登巴絲發動文宣戰，亦靠每一個身處外國嘅香港人落力解說。
職工盟主席吳敏兒噚日去日本，一連三日出席國際職工盟亞太區大會，爭取到難得嘅五分鐘，用英文同亞太區所有國際職工盟地區同國家代表，講出香港人點解要堅持五大訴求缺一不可，各行業打工仔女面對緊嘅白色恐怖。
吳敏兒係fb話，可能好多人好奇，工會代表知反送中運動堅持下去又有乜嘢用呢？佢解釋作為公民社會一分子，政治上有唔同團隊去其他國家講香港情況之餘，有唔少地區或國家總工會，同佢哋自己政府都有溝通機制，佢哋國家政府都希望透過總工會，知道香港運動發展成點，所以佢覺得唔同層次、唔同行業嘅代表們走在一起，等世界各地政府對反送中有多角度嘅資訊係非常重要。
之後吳敏兒同八方講，要得到呢五分鐘發聲機會，四年先得一次，仲要事先申請，而吳仲提交咗一個決議案，譴責克警暴力和譴責蒙面法，議案後會交由各亞太工會做表決。如果通過，全亞太區各總工會可以展開行動支援，要求當地政府跟進。
喺發言尾聲，吳敏兒仲邀請所有代表舉起手，大家一齊嗌：「Five Demands！Not one less！Stand with Hong Kong！」原來，當我哋面向國際，香港人爭取民主嘅心並不孤單。