昨日講起專家A，原來佢有仔女長居美國，已做美國人。左丁山有感於不少移民多年嘅朋友同學成為藍絲，問專家A平時點教仔女？專家A話：「我其實移過民，所以子女留在美國成為美國人，我又返過中國大陸做事，認識不少老幹部，知道國情太多，卒之我勸子女不要回流香港；我與太太居香港，有原因，老華人住美國，揸車能力減退就好大件事，好易變成宅人，因為公共交通遠遠不及香港咁方便。我教仔女就係要佢哋忘記自己係中國人，做咗美國人就效忠美國星條旗，住在那邊要奉行美國價值，先至可以得到心安。我見過不少老移民，成日夢想中國富強，為自己撐腰，在家慶祝國慶掛起五星旗，咁就惹人矚目，如果還在社交媒體發起反美親中言論，隨時會引起FBI注意，何苦由來？呢班人口口聲聲中國中國，其實佢哋啲子孫全部唔肯學中文，食漢堡包不吃叉燒飯。老中國移民內心掙扎幾十年，但叫佢哋搬番上海定居，死都唔肯啫！」
估唔到專家A有咁嘅想法，與好多老移民不同，於是問專家A如何睇目前香港局勢，佢就幾憂慮：「年青人追求自由民主，係美國價值，中國大忌，習近平強硬起嚟，香港會玉石俱焚。習主席呢勻睇錯人，2016年係要選委投票畀林鄭，我一位朋友係選委，屬建制派，本想提名曾俊華，點知被請入中聯辦吃飯幾次，又被請去深圳見北京高人，卒之佢頂硬上，不提名林鄭，亦不提名曾俊華。我曾問佢點解要咁硬頸唔識趣，唔聽阿爺話，佢講：林鄭冇思想，冇領導才能，只係一個執行官，由佢做特首，香港冇運行。現在佢又好似幾啱噃。」三年前舊事，今日講亦無用，大錯已鑄成。專家A話：「香港唔好彩囉！」習主席依家應該知道咗揀錯人。林鄭即使今天唔下台，照計一定不會連任，到時就淒涼咯。中國人社會必然係人走茶涼，窮在路邊無人問，富在深山有遠親。我以前在中資公司打工，上司董事長不知幾威風，享受咗五六年吹捧，但六十歲退休，返回上海，立即門前冷落，想打電話搞吓關係，冇人應酬佢。林鄭今天如此冷傲，佢卸任後如住在香港，冇人會理佢，到英國住，政治不正確而且更加受人白眼，到北京上海，到時佢就會見到中國人之真正面色。唔係講笑，我見上海老上司嗰鋪落寞法，都於心不忍。你讀吓柏楊本書醜陋的中國人，就知一二，相信林鄭未曾讀過！」