立法會喺7.1俾示威者闖入「裝修」後，要進行復修工程，搞咗幾個月終於搞掂，預計下星期可以開會，立會噚日安排記者入會議廳睇，基本上大部份設施整番好，好似示威者7.1時曾經塗污主席台背後的區徽，現在已經換番個新嘅上去，不過個區徽附近木板有明顯修理嘅痕迹，而被噴漆塗污嘅建制派議員座位亦已經清理乾淨，牆上面噴咗嘅鬧建制派議員、政府嘅口號，擦得乾乾淨淨，至於當日俾示威者整爛幾幅歷任主席畫，就未掛返上去。另外會議廳內嘅玻璃，喺7.1時有被人劃花，呢度似乎冇搞到，所以玻璃上嘅痕迹仍清晰可見。
下星期三復會
主席梁君彥話今次立法會「裝修」工程費用咗約四千萬港元，分別由建築署、機電署同立法會支付，亦會向保險公司索償，但暫未確定金額，至於被打爛嘅外牆玻璃仲未修復，梁君彥解釋因為玻璃外牆需要訂購，相信外牆復修要到明年先可以進行。其實梁君彥又唔使咁心急住，反正下星期三立會復會後，會發生乜事都未知，佢不如叫林鄭月娥、建制派又再煽風點火刺激群眾，否則隨時又要「大裝修」。
李八方