曼聯星期日喺英超再輸一場後，開季踢咗8場都只得9分，除咗創出紅魔鬼喺英超開季隊史最差成績之外，領隊蘇斯克查更成為自費格遜退休後，勝率最低嘅領隊！英媒星期二就爆出曼聯執行副主席活華特，對簽咗三年合約嘅蘇B已經失去耐性，如果國際賽期後對利物浦嘅大戰中慘敗，蘇B好可能會同上季摩連奴一樣，喺雙紅會之後執包袱。
英國傳媒指出，曼聯喺星期日0:1輸咗畀紐卡素之後跌落第12位，今年3月先拍板同蘇B簽咗3年合約嘅活華特，對球隊前景越嚟越擔憂，因為家陣曼聯只係比降班區多兩分。雖然國際賽期後同利物浦上演嘅雙紅會，曼聯嘅保羅普巴、安東尼馬迪爾同雲比沙卡等都有望復出，但陣中幾名較資深嘅球員，都開始質疑蘇B嘅戰術，甚至覺得呢位教頭明顯缺乏經驗，好難幫球隊扭轉劣勢。
蘇B勝率低過莫耶斯
自2013年夏天費Sir退休後，活華特搵咗莫耶斯接手，可惜莫耶斯只係教咗10個月，而呢6年內已換咗4名領隊，但比較番四位領隊嘅勝率，摩連奴帶咗曼聯144場贏到84場，勝率有58.3%僅次費Sir嘅59.7%，而莫耶斯同雲高爾分別都有52.9%同52.4%嘅勝率。蘇B嘅表現最差，帶咗40場只贏到19場，勝率得47.5%，所以英媒紛紛指出，如果曼聯喺雙紅會好似上年摩連奴領軍一樣慘敗喺利物浦腳下，坐正教咗七個月嘅蘇B好可能落鑊。
利記全勝高普被指狂妄
由於曼聯成績持續不振，曼聯股價喺蘇B入主以嚟已縮水約70.6億港元，星期一開市嗰陣，曼聯股價得15.85美元，比今年2月嘅高位跌咗成4分1，球隊市值更已由2月嘅35億美元跌到得返26億美元。到底炒咗蘇B，係咪就係曼聯「止跌制亂」嘅好方法呢？
至於曼聯雙紅會嘅對手利物浦，近期喺英超八戰全勝好風騷，祖爾麥迪比又贏埋英格蘭職業足球員協會九月最佳球員，唔知係咪因為咁成隊都好自滿，俾唔少英超對手話佢哋比以前寸咗好多，其中利記後衞安德魯羅拔臣喺上星期六贏咗李斯特城後，同對方前鋒艾約斯佩雷斯爭執，水晶宮前老闆西蒙佐敦亦都話，紅軍領隊高普喺記者會嘅言論比以前更加狂妄自大，如果畀利記贏埋今季英超冠軍，到時咪更加目中無人？