South Park出咗成個episode，嘲笑美國商界，為取悅中共而自我審查，中國亦立即將所有South Park影片下架。那邊廂，火箭隊總經理支持香港，NBA先跪底，又再「道歉」撐言論自由。作為一個支持自由嘅人，我唔會反對任何生意人投共，甚至只係保持沉默。
我信真正愛國嘅球迷，肯定不屑再去睇NBA呢啲外國勢力。要睇，都睇有美國人林書豪加盟咗嘅CBA，係咪先？問題係，你有你言論以至投共嘅自由，任何人亦有唔幫襯你、以及鼓勵市民都唔幫襯你嘅自由，所以開始有評論員鼓勵和理非，除咗上街遊行，仲可以企喺餐廳同店舖門口附近，和平地派傳單、叫口號，呼籲其他人幫襯之前，諗清諗楚先，齊齊做個精明消費者。同樣道理，我覺得中共以及其支持者，用經濟方式向其他國家或者企業施壓，我係唔會反對。甚至乎，我覺得應該歡迎佢咁做。
自從六月以嚟，銅鑼灣卒之可以行得番人，作為港島居民我好欣慰。另外，有唔少特色小店，係受惠呢幾個月以嚟嘅風波，生意大排長龍。對於本地受影響嘅連銷式食店，美心又好，富臨（1443）都好，我係有少少同情。但塞翁失馬，焉之非福？呢個實際係進軍大灣區、以至全中國市場嘅契機，唔少創辦人同我講，進軍中國市場，從來都唔係講做生意叻唔叻。有咗愛國商人美譽，可以話係無往而不利。
作為中小企又好，初創又好，創辦人應趁呢個時候諗清楚，究竟自己檔生意，同邊個市場會有「Business-Market Fit」或者「Founder-Market Fit」？好似我自己咁，已經無搭港鐵（066）超過一星期，因佢嘅服務太唔穩定。好在科技改變世界，只要下載Citymapper呢個App，輸入目的地，佢就會列晒所有交通工具選項同建議，可以輕鬆戒搭港鐵。
尹思哲
http://linkedin.com/in/wanszezit