【老少同行】
【本報訊】反送中逆權運動每一幕，喚醒全城公民意識，令不少市民醒覺區議員背後代表住一股強大地區政治力量，令他們意識到，區選也是一票也不能少。一名廚房佬，因721事件被襲，徹底領悟政治隨時「燒到埋身」，令他改變不重視區選心態；一名銀髮族遊行要塗白花油，隔着電視看到無數青年流血被捕，她希望用選票送年輕人入議會延續抗爭，答謝他們的付出。
記者︰歐陽聯發
對於區選，廚師蘇先生直言「上屆我連幾時選都冇留意，隔三年定四年選我都唔知」，今年23歲的他，五年前傘運仍是一個學生，「以前咩都唔理㗎，做學生咪返學囉，政治呢啲關我乜事？」「投票？反正我唔投都有人投㗎啦」，「區議員咪清吓後巷老鼠，延長紅綠燈兩秒，咩黨咩人做都一樣」。
反送中運動爆發後，蘇先生也參與過616大遊行，也響應呼籲登記做選民，但他自言投入程度不算高，直至721恐襲。那天晚上他在YOHO MALL收工，走到鳳攸北街看見有白衣人聚集，因為說了一句「真係好多白衣人」，就被一班白衣人圍毆。他背上的傷痕已淡去，但恐怖經歷令他徹底覺醒，「就算我唔理，政治都會燒到埋身」，自此港人抗爭日程成為他生活日程。
最令他眼火爆的是9月4日，有元朗區議員提出獨立調查委員會、成立檢討小組徹查721事件，「廿幾個人反對，幾個棄權，我諗心有冇搞錯呀，721咁大單，班建制想當冇事發生？睇到真係好嬲。」11月選舉蘇先生將成為首投族，他最樂見一班素人參政，「年輕人喺場運動佔一個重要嘅角色，街頭抗爭我哋會做，合法嘅、用選票去贏我哋都做，用盡方法去擴闊戰場，寸土必爭。」
「將來係屬於佢哋」
銀髮族李太，住嘉亨灣，728暴動案及周一反蒙面法首宗檢控，她也有到場聲援，看到大班年輕人，無懼被捕風險，以遮陣保護手足。「我土生土長，見到咁多年輕人咁團結，好感動，佢哋做緊啲我哋唔敢做嘅事。」6月至今多次遊行，她去到的都盡量去，70歲的她 每次都帶備白花油，她說堅持遊行是因為「年輕人企得咁前，點可以喺屋企睇直播，但我有孫年紀又大，始終唔可以企得前」，「睇住後生仔俾人扑穿頭，個心成日好唔舒服，點解呢個社會令佢哋搞成咁？我覺得負咗佢哋，上一代種落，但要佢哋受」。李太認為，「老人家冒唔到風險，好簡單，用選票囉投票囉，呢個一定可以做到嘅嘢，送多啲後生入去個區，將來係屬於佢哋」。