反送中運動持續四個月，政府上星期仲搞埋用緊急法推蒙面惡法，結果激到更多市民上街抗議，唔少人為被指撐警嘅美心集團旗下舖頭、與福建幫有聯繫嘅店舖，仲有中資銀行「大裝修」，其中本港代理台灣飲品店一芳，之前佢哋台灣嘅公司曾經表態撐北京，俾網民鬧係「共芳」，雖然一芳香港總代理劉心暉曾多次澄清，但仍未完全釋除各方懷疑，結果日前難逃被「裝修」命運，不過有示威者發覺搵錯對象，噚日竟然用行動致歉。
總代理讚港人可愛
日前一芳被人大裝修後，劉心暉亦曾在專頁中發長文，佢冇乜怪示威者，只係自嘲幫佢哋嘅招牌有個新design，仲話：「但是這個共，我一點都不想奶（舐），唯有冒着坐一年嘅風險帶住個豬嘴用天拿水抹咗佢。」更表明「一時嘅誤解我可以理解」，希望用團結面對共同敵人。
劉心暉嘅表態，加埋佢體諒上街示威嘅港人，令佢得到好多網民讚，有人仲唔好意思搵錯對象裝修，點知噚日劉心暉再喺fb專頁發文同貼相，話噚日朝一擘大眼，「有人傳來一啲咁美麗嘅畫面」，乜嘢美麗畫面？原來係一朝早有人幫佢哋義務清潔返被裝修嘅店舖！佢喺個po貼咗幾張義工清潔被裝修店舖嘅照片，仲大讚香港人真係好可愛！八方喺照片中見到，原本被噴上「共芳」嘅招牌、「香港人反抗」嘅鐵閘，已被清潔得乾乾淨淨。其實知錯能改反而更得人尊重，唔係好似警察咁永遠只有人錯，佢哋一定冇錯 ，咁咪更令市民反感。
李八方