才女梁芷珊連月來撐「逆權運動」，寸盡高官及藍絲藝人，前日特首林鄭月娥率眾高官發表電視講話，梁芷珊再化身「珊吹老師」發功，前晚至昨午於社交網連發多篇帖文，四部曲寸盡高官，更踢爆鄭若驊刻意搶鏡晒鑽戒。
做老臨都要專業
第一部曲，梁芷珊引述保安局局長李家超稱「警員編號已經話咗畀你聽身份，警方已經係冇咗特權」的報道，公開質問局長李家超：「係唔係如果有市民蒙面，但係喺身貼住/掛住/寫住一組號碼，例如A123456（7），咁代表『市民已經話咗畀你聽身份』？見你好sad、好不捨咁話：警察已經放棄咗特權！我哋市民同記者，都好想好似警方咁一樣放棄特權！其實我哋從來都唔需要特權，公平就得㗎啦！」
第二部曲，梁芷珊貼了林鄭率眾高官發表電視講話的截圖，寫道：「望住呢張相好耐，好多嘢想講，我只講四樣：（1）#忠奸：呢15個人之中，有冇係『忠』㗎呢？呢班人裏面，我感覺有兩個係忠嘅。感覺。希望佢哋可以忠到底，我知好難。（2）#便服日：（唔好意思好粗口）喂，做乜Ｘ啫？你哋係香港長官嚟，今日便服日呀？好想知點解你哋着成咁？係唔係又俾人整蠱，冇預早通知你哋要錄影？做老臨都着番件西裝褸吖大姐大佬！（3）#特區logo：點解特首前面個木講台上面冇特區logo？究竟喺邊度錄影？（4）#V #Like：我哋平時咪好興，影完張正經嘅大合照，跟住攝影師話：『畀個V再影一張』、『畀個like又再影多張』，唔知佢哋有冇影呢？」
網民轟影響市容
第三部曲，梁芷珊開獨立post講律政司司長鄭若驊的衣着：「以呢條絲巾嚟講，夏天當襯色又嫌佢太厚太大塊，冬天當保暖佢又搭得太過『呢啡』，個花個print啲色好實，絕對係全張相嘅焦點，最唔啱數。」跟着焦點去到鄭司長手上的巨鑽：「另外，佢嘅手背亦都好奇怪。一般垂低手嘅話，手背係向兩邊，點解佢會正面向前？係唔係着得太臃腫，格肋底啲布太厚，所以『啷』住咗？但係咁，我都見過好多闊太影相時，手背係一定正向鏡頭嘅，因為要晒戒指！而佢兩隻手都有戴戒指，見微知著，佢個人幾咁一絲不苟，好細心啊！」珊吹老師的見解令網民拍案叫絕，紛紛留言：「呢班人最影響市容，急需蒙面。」、「相由心生！醜陋由心而發」。
至昨日下午3時，梁芷珊再出post，寸爆政務司司長張建宗指「蒙面法」並非繞過立法會的言論是狡辯，「珊吹老師」以「先衝紅燈後轉綠燈」及「先強姦，後戴套」作比喻，痛斥他「佢用一大堆嘢去解釋『無繞過』三個字。」
撰文︰皓騫