【逆權運動】
兄弟爬山，各有各做。就是拿出大家的專長，和理的和理，文宣的文宣，勇武的勇武。近年以畫《香港重機》將本土交通工具變機械人聞名的插畫師葉偉青（Felix）就畫了一系列「HK Freedom」作品，以《機動戰士Gundam》為藍本，加上安全帽、豬嘴，變成勇武機械人，更勁的是有模型高手出手，將插畫實體化。
Felix說：「香港原來好多民間高手，點諗到砌模型可以宣揚政治訊息，幫大家打氣？」示威者作歌，藍絲抄；漫畫家畫漫畫，藍絲又抄，但有些東西是抄不來的。Felix及兩位模型高手Mac及Camus都說質素明顯有很大差別，「冇自由思想做唔到創作，藍絲點會做得好？」看到自己作品被實體化，Felix說：「見到自己嘅創作被其他高手立體化，都好開心，就好似呢場運動嘅其中一個口號一樣，兄弟爬山，各自努力，各自用自己專長去宣揚正義。」
冇膽上前線 以畫作打氣
說到早前出現的撐警漫畫，那些漫畫家連名都不敢出，Felix說：「佢哋都係為錢啦，有heart同冇heart嘅分別，佢哋連research都唔做，啲衫都同真實唔同嘅！」他說自己畫畫，構思及搵資料比較花時間，畫反而每幅只花約一小時，「早排運動，年輕人做好多抗爭，見到佢哋犧牲好多。我呢個年紀冇咁勇敢走上前線，見到佢哋受傷被濫捕濫暴，心情真係好差，都係想借助畫畫去宣洩情緒。點知畫出嚟咁多人留意，好似有打氣作用，咁我就繼續畫落去。」選擇高達為題材，是因為高達系列故事背景一向有不少政治、革命元素，「其實諗到渣古先，不過第一幅就畫咗高達。細個就鍾意連邦軍，因為主角，但睇睇吓又偏向鍾意自護多啲。」
掩住良心護旗可以搵人仔，憑良心政治表態就要有犧牲的覺悟，「第一日表態就預咗，有啲job你唔會有得做，但畫嘢都係忠於自己，想畫乜就畫乜，我唔理咁多。」Felix續說：「有啲傾緊嘅客，但佢叫我唔好講咁多呢啲嘢，咁我就索性算啦，唔傾喇。」
本身做五金行業，第一位將Felix作品實體化的Mac說：「呢幾個月我直情覺得去玩樂都有罪疚感，所以都冇砌模型。直至見到Felix張圖，覺得有意思先再做。之後就聯絡佢，同佢講希望製作呢個高達頭，大家唯一嘅共識，就係唔會拎嚟作任何商業用途。」因工作關係，以五金用的AB膠來製作，「成日接觸，所以好多時都想用五金材料做模型。好彩有啲電動打磨工具幫助，如果唔係咁硬都唔知磨到幾時。」雖說以高達頭原型製作，但基本上已經全改，足足製作了64小時，「個頭形都唔同，因為安全帽係圓啲。最難就係個豬嘴同眼罩。」眼罩右邊玻璃裂了……「製作時都有掙扎，會唔會令傷者再受傷害？不過後尾我見大家都向佢致敬，應該ok。」
「吉姆」在動畫中一向是攻擊力不大的配角，但當面對更強大的對手，永不退縮。「雖然是小吉姆，熱血勇氣強如GP03。」（GP03是攻擊力極高的機體）Camus就是被這個意念所吸引，明知對面是高牆，明知對方擁有壓倒性的裝備，但絕不放棄。「當時準備開一盒吉姆模型，於是就參考Felix嘅插圖去製作。」Camus做美術用品銷售工作，已有十幾年砌模型經驗，而且一開始就跟「師傅」學，所以基本功及技術都好紮實，「今次改裝主要係配色，頭上安全帽一定要有。個路牌盾牌就用膠片cut出嚟製作，仲有將激光劍改成雷射筆。至於地台就好似香港馬路咁。」在這個社會氣氛中，還有人說「玩XX不談政治」，Camus就不同意：「政治無處不在，政府點樣對待人民，人民就會有回應，我就用砌模型去宣洩自己感受。」
機械人冇人性 正邪靠操控者
說着畫畫模型經，其實大家最關心都是香港自己人。Felix說：「近日掛住畫呢啲畫，有時連客人委託嘅工作都遲咗交。」而他最新的作品，還有一系列「獅鳥」，「如果冇7.21，就唔會有獅鳥啦！而家啲人都唔信警察，其實係一件悲哀嘅事嚟。」說到機械人，兩位模型高手亦說：「第一隻砌嘅模型係高達，所以對呢個作品系列特別有感情。」將感情放在最有情意結的作品上，阿Mac無奈的說：「機械人本身係冇性，正與邪要睇操控嗰個人。」看過香港警察幾個月來的表現後，訪問中聽到這句特別有感受。
facebook : Camus Workshop、香港重機
採訪：陳孝義
攝影：徐振國