今次反送中運動中，國際文宣真係好厲害，呢個當然係連登攬炒巴同佢團隊嘅功勞，但亦有連登巴打提過，單靠海外廣告可能未必夠，特別係對外國年輕人，網上文宣都好重要，有連登巴竟然整咗個英文嘅角色扮演手遊，等外國人可以透過呢個game，由6月9日反送中運動開始，了解港人點樣走過成個抗爭運動。
文字RPG 玩家買裝備
呢隻叫「The Revolution of Our Times I」嘅文字RPG ，主要用文字方式，由你扮演不同角色做不同決定，去體驗由6.9開始點樣參與運動，而每個決定都有機會影響故事嘅發展同選擇，例如選擇走佬離開香港，就冇得選擇去前線，遊戲亦有得買裝備，提升力量去前線，又有不同任務可以打。
創作呢隻game巴打話，搞呢隻game係為爭取國際嘅支持，因為佢想全世界嘅人都有機會了解、體驗反送中運動，但佢係冇可能買幾萬張機票，叫晒全世界人嚟香港參與，所以就寫咗呢隻以文字為主嘅RPG，希望可以畀所有人都有機會參加呢場時代革命，體驗一下香港人由6月9號開始所經歷過嘅嘢。而呢隻game叫「The Revolution of Our Times I」，因為佢預仲有第二同第三集，暫時就只有android版，可以去Google Play store下載遊戲，巴打仲話遊戲嘅八成收入，每個月尾會捐畀星火。
李八方