「多餘，睇新聞話以後出街唔准蒙面喎，我好人好姐出街點會蒙面？」
「唔係喎，你老人家聽啲唔聽啲，蒙面係全包㗎喎，唔係全塊面包晒，係戴個口罩都包埋在內。」
「多餘，我有鬼力氣遊行咩，出街最多咪去街市。」
「唔係喎，依家啲警察要搞到合法遊行集會失控，咁就一定失控，就算和平遊行，行行吓人多你唔覺意撈埋一堆，走唔切，咪出事囉。」
「多餘， 如果話明係合法集會，啲人戴唔戴口罩關警察咩事啊？合法都要俾警察認住個樣？怕得咁多啊，我可以同警察講，我怕最近周圍一陣過期催淚彈味，怕聞得多會致癌唔得呀。」
「唔係喎，你咁樣做，阿sir萬一心情唔好，可以告你挑釁警察或者係阻差辦公㗎。」
「多餘，聽講係專門揀啲後生仔落手，我地呢啲銀髮族，做唔出嘅 。」
「唔係喎，你係佢老母就話啫，八十歲阿伯跪喺佢面前都兜心口踢一腳啦。」
「多餘，好仔怕爛佬，爛佬怕潑婦，我擺起個大媽咁款咪得囉。」
「唔係喎，好似話戴口罩截查到，就要有合理辯解，萬一冇醫生紙傍身點啊，傷風感冒唔一定要睇醫生，若然係怕人多地方被人傳染，仲惡搞。」
「多餘，咁我怕太陽曬，戴草帽同太陽眼鏡，都會遮住塊面啦。我話唔驚得咁多。」
「唔係喎，真係好危險喎，周街都係人，小傷風都係唔好出街好啦，又有霧霾。」
「多餘，紫微斗數大師話呢單嘢有排都收唔到尾，咁萬聖節見有人可疑，唔逐個逐個剝面具，警隊配備卸妝師啊。」
「唔係喎，叫你冇乜事唔好出街，出街就太陽眼鏡都唔好戴啦。依家兵荒馬亂，唔擦槍走火，警察喺天橋上面丟個垃圾桶落嚟，唔覺意砸親你都唔敢入醫院啦。聽話啦。」
「多餘，警察唔係有槍有彈有棍咩，仲有垃圾桶做攻擊性武器？咪盞製造多啲垃圾？」
「唔係喎，蒙面法咪就係俾啲警察惡過日本皇軍囉。」
「多餘，仲立咩蒙面法啫，咁咪即係戒嚴。」
「咁又係。老母永遠是對的。」