【區選大戰】
【本報訊】專制政權企硬令反送中抗爭未見出路，另一戰線已開打， 11月24日舉行的區議會選舉提名已開始，受逆權運動影響，全部452個區議會選區，有近450個已有民主及反送中抗爭者出戰，這場天下圍攻式選戰，民主派選情雖看好，但如何才能把對抗極權意志轉化為選票？民主派普遍認為抗爭與選舉要互相扣連，發起「風雲計劃」的戴耀廷形容區選成敗與普選訴求緊扣，「同街頭一樣，都係打緊一條戰線、一個陣地」，不應視作收割抗爭運動成果。
記者：陳珏明 歐陽聯發
由6月爆發至今的反送中運動，當中正是「兄弟爬山，各自努力」這原則，成功團結勇武與和理非兩派，早前宣佈不再參選連任利東一區議會議席的區諾軒，形容今屆區選是一座山，抗爭運動是另一座山，兩座山互相扣連，「喺前線抗爭，是兄弟爬一座山，喺社區踢走保皇黨，係爬緊另一座山，唔應該用血債票償將兩者連結，但大家同樣唔可以否定，爬區議會呢座山嘅重要性」。
區諾軒：區會資源畀建制派浪費
他不諱言，反送中運動「做到公民覺醒」，社區不少青年人除參與運動，更關注社區問題，但民主派「唔好覺得因為反送中就贏硬」，直言街坊不會單因「支持民主」就投票支持，區又認為，若更多民主派議員在區會當選，是重要的民主陣地爭奪戰，「區議會好多資源現時畀建制派拎去浪費，區議會變天回歸以來從未見過，如果我哋可以喺區議會執政，可以話畀大家知我哋可以做得比對方（建制派）好」。
佔中發起人戴耀廷認為，區選在今次整場抗爭運動中定位，從政府及建制派緊張選情，反映區選「某程度似把尖刀插在心上」，因為區會民選議席可選出2022年特首選舉委員會1,200人之中的117個選委，直接扣連爭普選訴求，「佢哋過去一直唔使擔心區議會選舉結果，但因為反送中就開始憂慮，證明今次選舉喺整場抗爭運動中係好重要一環」。
他解釋，他2017年提出「風雲計劃」，當時已針對這117個選委議席，「因為要拎一半民選議席先有機會，當時提出就覺得好難」，但今次如光復區會即可取下這117席，加上現有民主派300多席選委，隨時能觸動整個專制體制最核心部份，就是特首，「都唔能夠即時爭取到普選，但最少有更多政治籌碼迫使政制改動，有機會出現變天」。
戴耀廷認為應把區選定位為不同抗爭戰線，「區選可以看成係另一種陣地戰，呢個陣地仲冇咁易畀速龍嚟趕我哋走，未來四年喺地區、全港議題，同2022年特首選舉可以施壓，都算係一種進攻」。
戴耀廷：地區工作都係企最前線
但他不贊成血債票償說，因有人受傷、被拘留，要用另外方法向當權者及警察被問責，「選票結果唔能夠帶來改變」；惟同樣不認同有人說提選舉是食人血饅頭，形容是「對做地區工作朋友係一種侮辱」，「有唔少現任區議員或者積極做地區朋友都有被捕，佢哋喺地區都一樣面對好艱難環境，尤其藍絲集中地，其實佢哋都係企最前線，只係同大家星期六、日見嘅有所不同，反而呢條前線冇直播，要默默耕耘」。
戴耀廷從選民組成分析，認為過去投票給民主派的會繼續支持；於區選支持建制派，惟在立法會選舉才支持民主派的選民，就會改投民主派，加上新增的40萬選民，很大百分比又是年輕人，令他對選情相對樂觀，但始終距投票日仍有一段時間，「冇嘢冇可能，選舉結果始終要打開個箱數完先知，冇人可以保證」。