上星期六西甲上演戲碼估唔到嘅榜首大戰，皇家馬德里主場以4:2擊敗「升班馬」CF格蘭納達，以不敗戰績繼續穩坐榜首。而且，今夏以天價加盟嘅夏薩特終於為皇馬射入第一球，佢賽後就話呢個入波令佢充滿信心。另外，法甲一樣有榜首大戰，巴黎聖日耳門（PSG）主場以4:0大勝賽前排次席嘅昂熱，同樣新加盟嘅莫路伊卡迪射入首個法甲入球外，沙拉比亞亦喺PSG開齋。
施丹：夏神等咗好耐
今場皇馬開局非常順利，開波兩分鐘就由賓施馬先開紀錄，去到上半場補時階段，夏薩特有單刀機會，乖巧挑射破網，射入佢為皇馬披甲嘅第一個入波。下半場佢再助攻莫迪歷，後者禁區外射入世界波，皇馬領先到3:0。不過，今場頂替門將泰拔高圖爾斯打正選嘅艾路拿就玩波出事，喺禁區踢跌對手輸12碼，令客軍追成1:3，隨後CF格蘭納達更靠1次角球攻勢追到得番1球差距，好彩補時階段，後備上陣嘅占士洛迪古斯破網，助皇馬鎖定4:2勝局全取3分。
PSG四球大炒昂熱
今場終為皇馬開齋嘅夏神，賽後表示第一個入波令佢更有信心：「第一球係難啲嘅，不過入完就會更加有自信。我期望為呢間偉大球會射入更多波。我知道大家喺度評論緊我，我知道嘅，呢個入波畀咗我好大信心。」而皇馬教練施丹都大讚呢位比利時球星：「呢個係我哋需要見到嘅夏薩特，佢想要呢個入波好耐喇。」
同樣為球隊開齋嘅仲有PSG嘅沙拉比亞，今夏由西維爾來投嘅佢，喺PSG對昂熱嘅法甲榜首大戰中交出1射2傳，助球隊4:0大勝對手。沙拉比亞開賽13分鐘就為球隊先開紀錄，佢之後亦助攻同樣新加盟嘅前鋒莫路伊卡迪，令伊卡迪成為自2017年9月基利安麥巴比之後，第一位首度喺法甲正選披甲就取得入球嘅PSG球員。下半場PSG再憑伊祖沙古爾同尼馬嘅入波，大勝昂熱4:0，賽後續居榜首。
