鞏俐同關曉彤主演、陳可辛執導嘅電影《中國女排》已經開拍，前晚喺天津體育學院進行拍攝，噚日網上就流出電影探班嘅短片，成龍都去到體育學院探班，見到佢同鞏俐喺片場開心互動。
喺戲入面，鞏俐飾演嘅「郎平」一角造型首次曝光，着住中國隊教練服、戴假髮嘅鞏俐，一舉手一投足都同郎平十分相似。
演出陣容保密
《中國女排》係由中宣部同國家體育總局聯合拍攝，電影將於明年1月25日、農曆大年初一喺內地上映。劇情講述幾代中國女排嘅奮鬥歷程，以及隊員頑強拼搏、為國爭光嘅感人故事。至於演出陣容，電影公司一直保密，直到現時為止，只係公佈鞏俐飾演「郎平」一角，而女排選手惠若琪嘅角色，傳聞已經搵關曉彤飾演，另外仲邀請一啲前巴西女排著名球員到內地參與拍攝。而之前鞏俐接受訪問時，都話擔心怕自己演郎平做得唔好，因為會有一啲運動技術上嘅難度，呢個係佢從來冇接觸嘅領域，一開始入組嘅話就要日日同排球喺一齊，鞏俐又話最想挑戰嘅係自己未做過嘅角色，但自認最唔能夠做「装嫩的角色」，自己唔鍾意，也做唔到。
撰文：馮仁昭