民建聯同工聯會早前支持完政府硬推「送中惡法」後，近日又再力撐政府推出「蒙面惡法」，做法惹嚟唔少香港人反感。唔知係咪佢哋都知自己犯眾憎，有網民近日發現，有意出戰黃竹坑選區嘅工聯會、民建聯代表陳榮恩，佢喺2015年區選曾以455票差距敗於民主黨徐遠華，今次再挑戰徐，有街坊發現佢嘅宣傳海報「貨不對辦」，除咗將兩個黨logo縮到只有手指尖咁細，博人睇唔到，陳榮恩真人同海報入面嘅身形明顯差幾個碼，連個樣亦睇落都唔多同，俾人鬧佢造假。
陳榮恩：肥係舊照
不過陳榮恩之後出po申冤，話自己為咗繁重地區工作食無定時，搞到舊年體重去到人生巔峯，即係嗰張身形肥胖嘅相係舊照，但留意返，最新製圖上工聯會同民建聯logo都好似減咗磅咁細細粒。都好難怪，硬撐惡法係神憎鬼厭啲，睇嚟要重塑嘅係呢兩大建制黨呢。