十年冇拍電視劇的羅冠蘭，今次重返無綫拍《牛下女高音》，當大家以為黃心穎的「安心事件」會令劇集不見天日，結果又可以重出生天。
人生有幾多個十年？過去的十年，羅冠蘭在演藝教書，人人都叫她老師，她向記者遞上的依然是演藝學院卡片：「雖然已經冇教，但係都叫做有個電話聯絡留低。」
63歲的羅冠蘭，一生最大心願就是教書和演戲，她可以兩者兼得如願「教做戲」；前年更憑《寵我》贏盡各地影展，一齣戲贏了十座女主角獎，總算圓滿；不過，卻輸了愛情。
已記不起單身多少年的羅冠蘭說：「我從來都單身，其實我嘅愛情生活幾貧乏㗎，我拍過一、兩次拖㗎咋！」
記得的，是她婆婆一句影響她至深的說話，「呢句說話影響得我最深，佢話無論人哋點樣對你，寧人負我，毋我負人。」
撰文：文嘉龍
攝影：陳俊強
同周潤發係訓練班同學
羅冠蘭2017年辭去演藝教職後，「第一套」拍的劇集就是《牛下女高音》，她說今次在劇中其實戲份不多，她飾演的歌唱老師，主要對手戲是和King Sir（鍾景輝）。說起King Sir，羅冠蘭說King Sir是她的恩師，啟蒙老師。
不說不知，原來羅冠蘭亦是無綫藝員訓練班出身。
「我中學升浸大（歷史系）嗰個暑假，我參加咗無綫電視嘅訓練班，King Sir就係教訓練班，仲有陳有后老師。嗰時我點解會參加呢，因為學費好平呀，但有好多科目，時代曲呀古典唱歌呀，又有現代舞中國舞，好多嘢學，我覺得好抵，你用嗰個錢，你自己係請唔到老師教㗎嘛，嗰時咪去報名囉！」
周潤發是她同班同學，「係第三屆呀（74年），我咁嘅年紀一睇就知！有周潤發啦、林嶺東、鄧英敏、盧海鵬，嗰時我比較𡃁妹啲，因為啱啱中六畢業等入大學，我記得班入面最老土係我，紮住兩條牛角辮上堂，佢哋笑我係嗰啲螞蟻，其實係好老土，真係一個中學生，冇見過呢啲世面，我諗全班最老土就係我。嗰時就係King Sir教囉，就係咁樣開始，然後我入浸會之後，原來浸會個戲劇課程，又係King Sir教嘅，我就即刻剔佢嗰啲課程，四年裏面我每年都剔佢嘅課，佢所有教嘅課，我都上。」
當年受教，如今教人，羅冠蘭說自小志願就是教書，到接觸戲劇後正式開始演員生涯，她說，一生從未離開過教書和演戲。
「我Form 1已經有一個志願係做老師，我諗住教書，因為我讀咗訓練班接觸咗戲劇，我記得我之後教書兩年（在中學任教歷史和地理）之後，我做咗一個part time接觸到香港話劇團，然後佢就請全職，我就去考，點知請咗我，佢請咗我，我就諗當放吓假做吓全職演員先啦……直到我入咗演藝都係教書，所以我覺得我冇離開過我嘅志願，做戲同做老師，我呢世都係做緊呢兩樣嘢囉！」
觀眾覺得好誇張好憎我
羅冠蘭在香港話劇團位至首席演員，又是一個十年。「我入去嘅時候都冇呢個職位，初初入去冇諗呢啲，即係講得『粗（俗）啲』，執到呀佢請我，有乜嘢係好得過你支人工，唔需要擔心你嘅生活，唔需要擔心生活啫，唔係好富裕㗎吓，而你日日返工就係做戲喎，對我嚟講係幸運，我個目標都冇諗過要晉升，我唔記得係去到邊一年佢先有首席呢一個位，咁就升咗我上去囉，我都好感激佢哋畀咗呢個機會我。」
她曾在訪問中說過話劇圈子都有黑暗一面，結果惹來很大反應，「當我講咗呢一句說話之後，我俾戲劇圈嗰啲人喺度攻擊呀，但係我只係想講一句，我話不如咁諗啦，如果你覺得任何一個圈、藝術圈係冇黑暗點嘅，如果你真係覺得冇，我覺得係你太天真囉！如果你真係相信有，而你唔肯去承認，我覺得呢個唔係一個創作人應有嘅態度囉！」
當初由話劇世界跳入電視圈，羅冠蘭說早期改不掉自己的舞台化演繹，要好一段時間才懂得電視世界運作，「啲觀眾可能會好鬼憎我，嘩你咁鬼誇張㗎你，其實我係未調校得好，譬如我喺個鏡頭度眨一眨眼就係一個訊息，但喺個stage你眨一眨眼，第一行嘅觀眾都未必望到呀，唔好講第十行，我係要重新去學習同埋適應囉，初初適應唔到㗎，有啲觀眾覺得好誇張好憎我㗎，希望佢哋原諒啦！」
最深刻回憶是《烈火雄心》內的南山三虎以及和王喜的母子情。「如果你問我始終最入心嘅就係王喜啦，一開始大家真係好好呀，雖然中間係有啲誤會，因為王喜係比較認真嘅，所以佢對劇本嘅要求都係有啲意見，我又覺得冇乜問題喎，你提出咪大家商量一下囉，如果你覺得咁樣係好嘅，我咪去適應一下，對我又冇乜問題，但係可能旁邊有啲人唔係好舒服，乜原因其實我係唔知㗎吓，咁就出咗一個報道話佢教我做戲，其實真係冇一件咁嘅事！我仲記得有一次王喜嬲，佢以為我同記者講，我就同佢解釋真係冇呀，佢都終於明白。個戲每一次重演（播），我都好掛住佢，如果你話拍劇十年裏面呢，最牽動我就係《烈火雄心》嘅南山三虎同埋王喜。」
《烈火》群姐一角，羅冠蘭說最後的一、兩場戲，鄭敬基去醫院探她，叫了她一聲「契媽」，她說那一剎已感動到想喊。電視世界，羅冠蘭多演阿媽角色，現實世界，莫說有兒有女，連婚也未結、拖未拍。
抱獨身主義？「初初就唔係抱，但係後尾客觀條件被迫，其實係咪被迫我都唔知，我係咪抱獨身呢？冇特別係定唔係，只係每一日過自己覺得舒服同埋有意思嘅生活。咁有一個人（伴），我又唔知會點，因為冇發生到，所以冇想像到。係咪刻意逃避？可能有段時期係嘅，不過唔記得咯……」
單身多久？「我從來都單身，其實我嘅愛情生活幾貧乏㗎，我拍過一、兩次拖㗎咋認真嗰啲，你話去街食個飯嗰啲唔算啦，你話認真拍拖，都係一次兩次，咁肯定冇結過婚啦，拍拖嘅時間亦都唔係話太多，可能我頭嗰段時間太忙。你呢個問題又令我諗返，冇喎，又冇特別覺得好需求！」
好羨慕人哋話青春無悔
羅冠蘭說，對上一段感情已經是好耐之前的事，當年傷害極深。「好耐喇，𠵱家諗番起真係一個過去嘅古仔，點樣講呢，係……我唔識形容呀，可能亦都係年輕啦，唔係太……唔係太識處理，唔識處理嘅意思，係因為我拍拖經驗唔多，有啲嘢發生咗，我俾嗰件事傷害我，其實我可以唔好令到自己咁受傷㗎，但係我唔識囉，𠵱家諗番轉頭就係咁！（對方有第三者？）係！」
說起往事，令羅冠蘭沉思又嘆氣，「如果𠵱家講返過去又好似……我覺得對方有啲唔應該，去將我哋啲嘢，即係其實……好漢子係不說前頭人，係咪，搞到情況有啲複雜，我好慶幸過去咗囉，同埋之後一段時間，佢又嘗試聯絡返我，我已經唔係好識去處理，即係好迷惘，所以令到嗰件事完結得唔靚，我只係遺憾完結得不美麗啫！」
情關難闖，親情最親。說到影響羅冠蘭最深的人，是她婆婆。她公公和婆婆由廣州走難到香港，經過戰亂，難得在港安頓，公公後來卻另有新歡，她婆婆一直活得不快樂。「我婆婆真係一個好溫順好平靜嘅人，同佢一齊你係冇壓力，就算你做得唔好，佢都係『唔好咁啦』，我又冇見過佢發脾氣。佢真係一個我最重要嘅人，細個嗰陣我唔識，但係佢喺你身邊，你真係感覺到一種慈愛、一種溫和，好舒服嘅感覺。呢句說話係影響得我最深㗎，佢話無論人哋點樣對你，寧人負我，毋我負人，我諗佢嗰時唔係教我啲乜嘢，可能佢只係喺某啲事情上講佢睇法，佢話無論人哋點樣對你都好，你問心，你都不能虧欠人，sorry，我好掛住佢。」羅冠蘭忍不住流淚。
這句說話代入到自己感情世界？「任何（代入到），點解我有時希望自己做得好啲，有時有啲嘢你好嬲啦，我係直接反應，當然過後呢，你會好後悔，你可以冷靜啲㗎嘛，或者人哋咁樣對你，你可以退一步海闊天空，有時覺得自己做唔到囉！」
羅冠蘭說對青春有悔。「我好羨慕人哋話我對青春無悔，只要有人問我，問我對人生有冇遺憾，我會話畀佢聽有，因為我真係覺得我活得唔夠好，我對我嘅青春或者我嘅人生有悔，或者有句說話係咁講啦，我可以講我覺得生命對我係有啲虧欠，但係我覺得我對生命嘅虧欠更多。」
有甚麼悔？「悔在我活得唔夠好囉，我希望我做得好啲囉！（點先為之好？）任何，整個人生，我覺得可以活得好啲，或者有少少嘅部份係我嘅要求有啲高嘅，呢個我都相信！」
咁做人好辛苦？「都辛苦嘅！」
後記：一個WhatsApp
這天訪問，羅冠蘭的確辛苦，她寧願帶病上陣，也不改期受訪。其間聲音已帶點沙啞，一停機更加咳過不停。
她說：「我啱啱嚟之前，收到一個朋友WhatsApp，我幾乎喺車上面喊，原因我同佢講我咳到半死，佢就講唔好怪自己，病唔係你嘅選擇。我睇完呢一句說話，我已經感動得好緊要，就係呢句說話我𠵱家諗，病唔係你嘅選擇，但係有好多嘢我係可以令到自己唔病㗎嘛，如果我照顧自己好啲、着多件衫，病咪唔會嚟囉！」
小小一個WhatsApp都可以被觸動，羅冠蘭就是感情豐富的天生演員。羅老師剛過生日，天秤座。
場地提供：Teppanyaki Kaika（The ONE）