逆權運動遍地開花，但好多藝人為怕得罪內地，唔敢企出嚟發聲，同時又喺社交網公開表示愛國，擦晒內地鞋。早前建制派搞咗幾個撐警活動，「薑佬」、「瘦姐」、「阿伯」同「偽人」都有企出嚟撐警。而曾經喺大台做奀星嘅「靚仔哥」，最近都撲出嚟撐警，仲拍埋片表示支持。
不過，Jessie聽朋友講，靚仔哥其實係個大壞蛋，佢娶咗個空姐老婆，老婆對佢死心塌地，明知靚仔哥冇錢冇名氣冇前途都要同佢一齊。而靚仔哥雖然搵好少錢，但佢都要租屋住，事關屋租係佢老婆負責，唔使靚仔哥畀。
本來兩公婆一條心，邊個搵幾多唔應該計較，但朋友話靚仔哥成日媾女，就算結咗婚之後都完全冇停過，仲試過多次斷正，畀老婆知道。話說佢老婆有加拿大護照，早年就同老婆一齊移民，點知靚仔哥喺加拿大遇到一位影迷，兩個人撻着咗，畀老婆發現，靚仔哥就聲稱會斬纜，點知其實得個講字，兩個人仲偷偷哋來往，激到靚仔哥老婆死心，決定同花心老公分開，而靚仔哥就回流返香港，四圍𢱑撈。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。