【本報訊】3年前因為魚蛋革命被控告暴動罪後，獲德國批出政治難民庇護身份的本土民主前線前召集人黃台仰在美國接受《蘋果》專訪，指港人以龐大代價換取撤回送中條例只屬「守住」，但他慶幸香港人開始認清中共才是真正敵人，斥中共一直以「鬥爭」手法對付香港，形容今次是香港人「求生」之戰，「不再絕地掙扎就會被消滅」，強調要繼續和勇不分，展示對抗極權的意志。
流亡德國的黃台仰今年中獲難民資格後開始四出為香港發聲，更向各國提出援助香港，給予示威者難民庇護。
由文化開始 逐步滅絕港人
他上月底到美國訪問後在華盛頓接受《蘋果》專訪，他說難料事態發展：「真係唔識答，因為10.1之後冇人知會發生乜事，可能之後就實施《緊急法》，世界就唔同咗」，但他認為香港人在今次運動的思維上明顯有進步，「香港人終於知道我哋嘅敵人唔止係民建聯、建制派議員同埋香港政府，其實幕後黑手係中國共產黨」。
正在德國修讀政治與哲學的黃稱，離港後鑽研共產黨歷史，「佢哋（中共）一直以嚟對香港嘅策略都唔係以政治mindset（思維），反而係鬥爭思維去對香港，當你明白原來所謂我哋主權政府係一路用鬥爭方式對付我哋嘅時候，香港人終於意識到面對嘅問題係有幾大」。
他解釋指，若以政治思維解決問題，「應該係用尋求共識，能夠喺大家有唔同意見嘅情況下搵到共識繼續行落去」，但鬥爭思維則只有中共贏、香港輸，「好明顯共產黨不單止無嘗試過尊重香港人、願意聆聽香港人，佢係想消滅香港人」。
問題環環相扣 已無路可退
黃台仰舉例指，不少香港小學生現在只懂說普通話，港人不自覺內地化、接受中共專制，正是香港人身份、語言及文化被消滅的證明，故他形容反修例運動不僅是一場政治運動，只是香港人求生的運動、革命。
中共以鬥爭手法對付香港，香港又有何生存空間？黃沉靜良久後稱：「我相信大部份香港人都明白香港前途暗淡……好多西方國家包括德國同中國貿易來往仍然好密切，要喺短時間內出現一個大空間畀香港人去爭取更大自治權甚至乎係民主，我覺得係比較難，但唔代表呢樣嘢唔會發生」。
黃台仰認為，港人已無退路，又指有示威者提及「港獨」不是運動失焦，而是反映運動揭露最核心的香港前途問題，「所有嘢連埋一齊，點解警暴冇人需問責？因為政府唔係民選，可以任意妄為包庇警隊。點解政府唔係民選？因為中共唔畀香港有民主。點解中共壓制香港？因為呢個係極權政體本質，唔會畀自由、民主你。咁點解仲要相信，『高度自治』可以追究到警暴？」而所有問題最終都會回歸香港將來要變成怎樣的政體這問題。
他認為，現階段首要保持着街頭能量，同時要保護到前線的抗爭分子，則要「和理非」升級，包括能癱瘓香港經濟的「真三罷」、深化文宣，「好似《願榮光歸香港》為運動注入咗新能量」。
他強調要維持和勇不分，亦認同「中國人權」執行主任譚競嫦所言，國際上應將香港塑造成有希望、有可能贏的角色，要求國際支援，因為香港的問題是全世界問題，要梳理香港前途問題，要中國政體有改變，故香港抗爭長遠而言勢為全球政局泛起漣漪，蝴蝶效應一觸即發。
■記者梁穎妍