林家棟監製的黑色喜劇《殺出個黃昏》昨日在西環拍攝外景，電影主角謝賢（四哥）與馮寶寶、林雪等齊齊現身舊樓內，馮寶寶開心展示手機中的舊照片，她說：「我同四哥合作嘅時候係手抱咁大，當時4歲，喺《連理枝》入面演男仔，嘉玲姐係我媽媽，四哥係我爸爸，所以到𠵱家我都叫佢四哥Daddy。」提到60年後再見面，馮寶寶笑言四哥很忙，很難約，四哥則謂自己冇事忙，並透露女兒婷婷將返港，又謂未見過孫女。提到馮寶寶6月在泰國遇車禍，她說：「冇事嘞！之前Z咗（鼻樑被撞到變形），入面鑲咗膠片，推番正佢，5日後已經拎返膠片出嚟。」
提甄珍大耍太極
馮寶寶又指劇組對她很好：「雖然每日需要拍14小時，我仲要早兩個鐘敷面，不過拍兩日就休息一日，可以瞓吓覺做facial。」馮寶寶指她將整個廚房搬來香港開工，並親自烹調「友德汁」蔬菜汁慰勞大家。至於問到四哥之前探望患病的甄珍，馮寶寶笑問：「係咪復合呀？」四哥即大耍太極說：「邊個甄珍？台灣都有幾個喎，真係唔記得，等我打電話畀佢。」
炮製不一樣四哥
另外，林家棟透露今次只做監製，沒有參與演出，但每天都會監場，以便照顧謝賢和馮寶寶，他說：「好難得有呢個組合，四哥到𠵱家都好小生，但今次我唔准四哥chok，要畀觀眾睇到一個不一樣嘅四哥。」家棟透露四哥係退休殺手，因擅長用刀，退休後轉做刀削麵師傅，當中有不少動作戲，家棟指四哥一拍打戲即精神奕奕，他說：「仲有其中一場喊戲，我仲擔心四哥喊唔喊到，點知佢即刻就嚟，我仲問佢係咪有心事？」
採訪：羅慧敏
攝影：林賓尼