38歲的鋼琴王子陳雋騫（Phoebus），父親陳鈞潤教授是香港大學前外務處處長，曾任中英劇團董事局主席。Phoebus近年由鋼琴家變為跨媒體音樂人，繼承父親的藝術細胞，在本月上演的舞台劇《人生原是一首辛歌》中飾演著名作曲家陳歌辛的兒子陳鋼。談及父子情，他感觸良多︰「爸爸老了要見多啲，想講乜就講，唔好有遺憾。」訪問後個多星期，陳鈞潤與世長辭，人生難料，愛要及時。
撰文︰祖李
攝影︰沈健程
陳雋騫出身音樂世家，父親陳鈞潤曾是政府高官，但公餘為演藝界繙譯劇本、歌劇填詞。父親藝術成就高，教子亦甚嚴，陳雋騫自小學琴，奪獎無數，父親卻甚少讚他，但Phoebus慶幸父親嚴格，令他沒有被勝利沖昏頭腦︰「作為父母，唯一不能給予下一代嘅就係挫折，呢點對成長太重要，好欣賞父親唔係成日讚我，令我自信心偏低，正正因為咁，令我學識謙卑。」
反思與父關係
原來Phoebus與父親都偏愛陳歌辛︰「故事中陳歌辛嘅遺願係同個仔陳鋼坐喺鋼琴前分享音樂，舞台劇會安排我哋用鋼琴奏出《梁祝》，好感動、催淚。呢幕令我反思到同爸爸嘅關係，我同爸爸經常合作嘅主題曲就係陳歌辛隻《花樣的年華》，呢首歌好代表我兩父子，每次彈都好感慨。爸爸老喇，有一日會離開，我同佢之間有冇遺漏？諗真原來好多，傳統中國家庭，父子間嘅愛唔慣用言語表達，𠵱家我醒喇，要見多啲佢，想講乜就講，唔好有遺憾。」他上月中於fb宣佈父親死訊時，不忘留言給爸爸︰「我愛你，我不會令你失望的。」
少年得志的Phoebus，當年與圈中才女黃宇詩拍過拖，亦戀過落選港姐姚婷芝及歌手甄穎珊，2009年底與認識8年的女友陳曦蓓結婚，他直認當年風流︰「花弗，後生仔要嘅！我𠵱家都同後生仔講要玩盡佢，因為玩盡咗，你至知邊個係最愛，邊個最唔捨得。」
放下輕狂歲月
不過，輕狂過後始終會歸於平淡，Phoebus說︰「當年我輕狂到可以揸住架跑車，喺屋企停車場踩盡油，跟住停車場所有車嘅防盜響晒，即時爽晒。後來同葉青霖分享，佢話後生都係咁癲！就係佢點醒我點樣放下輕狂歲月，覺得自己ready好就30歲結婚。」婚後育有兩女的他，已經修心養性。
場地提供︰御一空間
