特首林鄭月娥昨日訂立《蒙面法》，引來全城鬧爆，其中網民發現，熱愛行山的周潤發最受影響，昨日有人在fb上載新相，見到發哥戴上黑帽、黑口罩、長袖黑衫配黑褲，在何文田與一師奶合照，據知發哥幾乎每日都以這身打扮行山。
杜汶澤昨日在fb談到惡法，他指立法純屬搞笑：「如果200萬人戴口罩上街，咁就算有呢條法案又點呢？如果警方認為係一場非法集結，即時拉你，咁你蒙唔蒙面又有咩分別呢？」阮民安（Tommy）就擔心林鄭陸續有來：「蒙面法對佢嚟講係前菜，相信佢會更加無理去推香港一啲唔公平法例，如23條、國歌法、辱警罪等。」
夏蕙姨：化淡妝見人
黃秋生以短訊回覆︰「如果懷疑有好多人喺衣服內藏有武器，係咪要立穿衣法？」他認為反效果好快出現，而且會出現逃難潮，他說：「不如乾脆宣佈香港係警政府啦。」他指要停止暴力，應由政府行出第一步。
王宗堯則指：「林鄭與團隊嘅政治暴力已經完全摧毀咗香港。」徐天佑說：「咁傷風感冒又唔戴得口罩？下下咁緊急，搞到人心惶惶。」梁芷珊在fb出帖文，雖然沒有開林鄭名，但留言：「喂！八婆，好就女人，唔好就累人！你知唔知你做緊千古人版呀？」
育有一女的魏駿傑，昨午於九龍塘接囡囡放學後接受《蘋果》訪問，他得悉學生有病都不能戴口罩返學後謂：「咁又唔合理嘅，咁細個，但係咪要中、小學分開處理？咁細小朋友唔通走去暴動呀！」他嘆謂：「惟有唔好病啦。」而當黃夏蕙知道有機會化濃妝上街都「出事」，她說：「咁我咪化淡妝見大家。」
記者：徐錦池、孔志豪