今年十．一中共建政日，市民講明當日上街「賀佢老母」，港府就梗係緊張，北京班國安公安更加唔會放軟手腳。作為今次反送中抗爭運動最聚到網民嘅連登討論區，手機應用程式當日近乎全日癱瘓，好明顯受網絡攻擊，但規模有幾大？連登管理員出咗po交代事件，八方睇咗嚇一跳，單係十．一當日，連登竟然受到290億次DDoS攻擊，係8.31攻擊嘅20倍！你話中共今次出手幾重，擺明一定要連登死機！
連仔前晚出公告交代十．一被攻擊一事，話有人繼8.31之後，再次利用來自世界各地嘅殭屍網絡對連登進行DDoS攻擊，8.31當日連登總共受到超過15億次DDoS攻擊，八方以為已經好誇張，點知今次仲誇，由十．一朝早9點到夜晚10點，連登受到總共超過290億次攻擊，最高峯攻擊頻率去到每秒70萬次，係8.31攻擊嘅20倍，完全破晒紀錄。
巴絲打氣：畀月費都撐
連仔話由於受到超大型攻擊，所以造成網絡擠塞同令伺服器一度超出負荷無法正常運作，結果令會員無法正常瀏覽同發表留言，當中有大量iPhone用戶開唔到連登App，Android同網頁版亦頻密出現斷線，直至到當日夜晚10點攻擊先開始放緩，服務開始回復正常。
連仔又叫所有巴絲放心，網站數據同會員資料未受影響，又為未能提供穩定服務致歉。好多巴絲留言打氣，話唔使道歉，連登冇做錯到，最緊要係連仔一定要頂住，唔好怕中共，表示一定支持連登，就算要畀月費都冇問題喎。
李八方