由ViuTV打造的組合ERROR四子肥仔、保錡、193同阿Dee，前晚喺旺角麥花臣舉行首個talk show，內容圍繞近日社會氣氛同民生問題，開場前觀眾先為10.1中槍學生默哀。
笑肥媽跳掣
肥仔自嘲因身形肥矮，成日被指似曾志偉，保錡就自稱似陳偉霆，仲扮對方早前為品牌拍宣傳片時講英文，阿Dee笑話：「大家唔可以笑佢英文差，今時今日佢服務大陸人，咁嘅水準好正常。」螢幕又播出中國國旗同譚詠麟、肥媽等撐警嘅畫面，佢哋寸盡前輩：「娛樂圈都一國兩制，一係唔制，護旗就乜都制，肥媽就跳掣。」
叫口號打氣
四子又講辛酸史兼玩不文，肥仔入行前成日扮卡通人物，曾經要着加細碼衣服：「雖然我肥，但我仲見到林俊傑（JJ）！」阿Dee三歲開始已有M字額，佢以《龍珠》嘅比達造型現身，講解髮線問題，又話：「撒亞人王子比達橫空出世都冇人識，等於姜濤落街被人查身份證一樣。」
嘉賓游學修以獨白形式講MIRROR同ERROR：「E-kids同EO2你哋都分唔清，BOYZ其中一個瀨晒嘢，我哋生於錯誤時代，做乜都錯，香港地需要MIRROR，更需要ERROR。」四子感動落淚。完場觀眾高呼口號：「光復香港，時代革命，沒有暴徒，只有姜濤。」完騷後姜濤指日前被截查時係有啲驚，但自己比想像中淡定。
撰文：馮仁昭
