香港警方向中五生近距離開槍後，十．一自此形同「港殤」，唔少市民表明往後每年10月1日，必定以黑衣悼念香港曾經有粒刺穿人心的子彈。而今年底舉行嘅區議會選舉，建制派候選人自必被追問關於警暴立場，事實呢次亦是一場價值抉擇，選擇站於200萬人或777小圈子選出的特首一邊？結果影響深遠，針對警員前日嘅一槍，料建制派亦避無可避，必須回應。
「狙擊建制唔一定要鬧」
導演蔡錦源喺facebook分享短片，指噚日上午喺火炭遇上當區區議員龐愛蘭，當時只向對方問咗一個簡單問題：「想問一句，你支唔支持警察開槍呀？」片中見龐愛蘭似乎措手不及，聽畢後神情錯愕，繼而不發一言，欲喺兩助手陪同下離開；其後蔡錦源再追問：「你支唔支持警察開槍？點解咁簡單嘅問題都唔答？」龐繼續左顧右盼未予理會。
冇答案有時就係一個答案。帖文最後補充：「狙擊建制，唔一定要力竭聲嘶咁鬧」；確實，有時以婉約態度提出問題，似乎比破口大罵來得更有殺傷力。