金牌電影製作人崔寶珠上月初因為肺癌病逝，享年74歲。崔寶珠嘅家人噚日喺九龍殯儀館為崔寶珠設靈，喪禮以道教儀式進行，並於今日舉行大殮儀式，靈柩隨即會移送至將軍澳華人永遠墳場安葬。
橫匾「懿範長存」
家人依照崔寶珠生前遺願，整個喪禮全程低調進行，所以靈堂門外一早放置幾個屏障遮擋防止傳媒拍攝，只見靈堂掛上寫住「懿範長存」嘅橫匾。傍晚時分開始有唔少圈中人到場，包括鮑起靜同老公方平、張同祖、羅啟銳同張婉婷、岑建勳、施南生、田啟文、林子聰、鍾珍、奚仲文、文章、劉天蘭同鮑德熹等，佢哋都着上素服，齊齊嚟送別好友最後一程。
崔寶珠多年嚟打造出唔少經典電影，包括《精武英雄》、《臥虎藏龍》、《霍元甲》同《功夫》等，同多位天王巨星可謂合作無間，所以噚日好多未有現身嘅圈中人都有送上花牌致祭，好似李連杰、周星馳、李安、成龍、楊紫瓊、郭富城、曾志偉、張震、關錦鵬、馬伊琍、鄧超同孫儷等等。
另外，香港電影導演會、香港電影工作者總會、香港電影製作行政人員協會等亦有送上花牌，花牌放滿整個靈堂內外，可見崔寶珠喺圈中人緣極好，受到唔少電影人尊重。
撰文：馮仁昭