荃灣官立何傳耀紀念中學中五學生健仔俾差人用實彈向住胸口開槍，引嚟國際同香港社會各界強烈批評，何中學生同校友更加唔使講，但何中校長謝潤明、副校何偉雄同校友對話，一陣又話未睇片唔譴責警方、一陣又提「母子論」話學生唔應該打爛晒啲嘢，搞到班校友網上狂鬧校長、副校，前特首梁振英鬧埋一份，但佢係覺得校長唔夠藍，要開除學生學籍，不過最神奇係，689叫人做dirty job後立即辭職，唔少網民話689擺明玩用完即棄，做藍絲唔會有乜好下場。
fb連發多帖搞學界
689其實真係好得閒，可能去完中共建政觀禮冇人理佢，噚日喺fb連發幾帖針對何中同健仔，先叫謝潤明革除健仔，之後再貼一封畀謝潤明嘅信，叫謝馬上革除健仔，最神奇嘅係，689話革除健仔後謝要立即辭職。有何中舊生同網民話，其實校長、副校已經俾舊生鬧緊冇撐學生，但689仲嫌人唔夠藍，要革除學籍先得，但即使肯做dirty job，都要校長辭職，反映689真係對藍絲都係用完即棄，難怪建制陣營入面冇朋友，俾自己友篤到冇得連任。
又有網民話，建制自己友教聯會都有發聲明慰問健仔，祝願佢早日康復，689係咁搞教協撐健仔、冇譴責健仔，689又敢唔敢搞埋教聯會？
李八方