堂堂上屆歐聯亞軍，熱刺喺今屆賽事條路絕對唔易行。周二歐聯分組賽第二輪賽事，B組熱刺喺主場慘遭拜仁慕尼黑屠殺，狂輸2:7，締造英格蘭球隊喺歐聯主場最大敗仗嘅不名譽紀錄，亦係熱刺球會史上首次喺主場輸七球。下半場拜仁基拿比個人表演連入四球，被呢位曾經效力過阿仙奴嘅翼鋒摧毀，熱刺作為兵工廠死對頭，自然有唔少廠迷落井下石，連阿仙奴嘅比利連都嚟抽吓水。
熱刺喺開賽12分鐘就由孫興民先開紀錄；但佢哋全場領先時間就只得三分鐘，拜仁就由甘美治射入靚波扳平，到完半場前，狀態大勇嘅羅拔利雲度夫斯基建功反超前2:1。換邊後，基拿比喺53同55分鐘連入2球，之後熱刺獲12碼由哈利卡尼射入追成2:4。但喺比賽最後10分鐘內，基拿比喺83分鐘入第3球，到87分鐘羅拔仔入佢今場第2球，一分鐘後基拿比再建功演出「大四喜」，助拜仁7:2血洗熱刺，B組兩戰全勝坐穩榜首，熱刺得一分包尾。
廠迷同比利連齊抽水
熱刺成為歷來首支喺歐聯賽事輸七球嘅英格蘭球隊，上一次英格蘭球隊喺歐戰輸得咁大鑊，原來又係熱刺，1995年圖圖盃對科隆慘敗0:8。今場拜仁贏波英雄基拿比，更有趣係佢曾經效力熱刺死對頭阿仙奴，由兵工廠出道到2016年被當時領隊雲格以500萬鎊（約4,800萬港元）轉會費賣畀德甲雲達不來梅，一年之後就轉投拜仁，其間曾被外借去賀芬咸，到近一年終於進佔拜仁主力位置。生涯首次「大四喜」，年僅24歲嘅基拿比賽後話：「我上一次喺一場比賽入四球，好似係踢U8（八歲以下少年隊）嘅時候。」佢亦喺自己社交網開心留言：「North London is RED!!!（北倫敦係紅色世界！）」呢個紅係指拜仁，阿仙奴都乘機可以抽吓水。
一沉百踩，阿仙奴球迷自然唔會放過恥笑死敵嘅機會，廠迷紛紛留言揶揄之餘，連阿仙奴右後衞比利連都喺twitter（小圖）留言大讚基拿比，不過廠迷又唔好忘記，佢哋連續三季都冇歐聯踢喎。
