周一英超場「魔仙大戰」最後1:1和氣收場，曼聯領隊蘇斯克查賽後就怪旁證亂舉旗令球隊被追和。不過蘇B領軍下今季頭7輪2勝3和2負得9分，係英超成立以嚟紅魔開季七輪後最低分嘅一季，暫時仲衰過當年俾人鬧爆嘅前領隊莫耶斯。
7輪9分創近30年最低
紅魔今場雖然靠中場麥湯米尼完半場前射入世界波領先，但下半場踢到58分鐘，就被阿仙奴嘅奧巴美揚追成1:1，最後兩軍各一言和。兵工廠作客攞到一分，領隊艾馬利就話「唔完美但可接受」，但對曼聯嚟講就絕對接受唔到；因為佢哋又失兩分，喺聯賽榜排第10之餘，仲令蘇B成為英超成立以嚟開季最失敗嘅「魔君」，踢完七輪都係得單位數積分，仲衰過費格遜爵士退休後另外三位領隊莫耶斯、雲高爾同摩連奴。原本球隊開季七輪英超最低積分紀錄，係莫耶斯喺13/14球季嘅10分，而對上一次曼聯過7輪都唔夠10分，就要數到英甲時代嘅89/90球季，當年紅魔開季7輪得7分，最終得13名。
指旁證舉錯旗累失波
不過，蘇B賽後就投訴旁證，話奧巴美揚入嗰球，旁證要負責任。當時紅魔後場傳失波，阿仙奴小將布卡約沙卡截到後傳畀奧巴美揚，曼聯中堅哈利馬古尼明明喺旁證面前包晒越位，但旁證發雞盲照舉旗，令防守球員都猶豫咗一下，結果奧巴美揚輕鬆射入。原本呢球就判「詐糊」，但後來視像助理裁判（VAR）改判入球有效，都好難怪蘇B會發炮：「旁證舉旗話越位，影響晒後防球員嘅判斷。當時艾舒利楊格見到旁證舉旗就猶豫咗，冇即時做好防守，其他球員都可以幫到迪基亞多啲。」
不過，除咗蘇B賽後被批評外，阿仙奴嘅新隊長格列沙加都一樣唔好受。事關賽前做咗正印「廠長」嘅佢，上半場對住麥湯米尼腳世界波，竟然做縮頭烏龜避波，令門將賓特尼奴反應唔切而失波。賽後唔少廠迷都喺網上表示對呢位新隊長好失望：「沙加身為隊長竟然避波，可恥！」