現年41歲的陳智燊自兒子Damon去年出世後，人生有了重大的啟發，他坦言無論演技及處世，囝囝都是他的人生導師，妻兒是他的生命動力，令他充滿反思，尤其目前面對香港逆境，他覺得惟有愛最大，自己的家庭和工作都在香港，不會有太多的想法，包括移民。
陳智燊的處男舞台劇《人生原是一首辛歌》將於本月中公演，扮演的角色與兒子相處冷漠，現實中的他和囝囝卻如漆似膠，他坦言太太宋熙年（Sarah）跟兒子是其生命動力：「喺我個bubble裏面，有老婆同個仔，唔可以冇老婆，會扭耳仔，舊年離巢轉變，面對每一個挑戰，有時我會鑽牛角尖，但見到佢哋，我就只會諗努力做嘢就夠，佢哋畀我好大力量。」談到太太投訴地位被囝囝取代，他先語塞後默認：「囝囝要照顧多啲，所以就好似偏心咗。其實我兩個都掛住，我好公平，老婆六成，個仔四成。」
「挑戰我耐性」
父子間真情流露很窩心，但陳智燊有時又會擔心過於溺愛，令囝囝煩厭而感到忐忑不安，亦因為太愛，連體罰都不會：「教仔比教女可以嚴厲啲，但又唔使用到體罰咁嚴重，好多人以為我好腍，成日笑笑口，但其實我惡時都可以好兇。以前以為個仔唔使咁早教，但佢七、八個月已經識睇你眉頭眼額。」他直言因潔癖影響有點兒強迫症，有時會好固執和鑽牛角尖，但囝囝正好挑戰他的小執着：「你只可以接受佢嗰套玩法，所以佢係屋企真正話事人，佢挑戰我耐性，要多啲體諒別人，話就易，做就難。阿仔佢好鍾意掃跌啲嘢，佢唔會同你溝通，亦冇概念，你惟有勸佢、講道理，如果同其他人相處時都當對方係BB，相處應該好和諧。」
迷惘唔開心
陳智燊其實很有自己想法，不易妥協，他說：「當我係新人時，惟有聽話跟住行，但盲目咁跟咗幾年，自己好迷惘，唔開心，之後演咗十年八載，開竅、識演嘞，咁同導演就多咗交流，磨擦一定有，但你講得掂我，我跟你，但你唔講道理，我就唔服。」他說這個世界要先放棄，才可以得到更多，去年離開無綫的決定很難︰「出到個世界至知原來咁大，可以玩嘅嘢咁多。」
撰文︰祖李
攝影︰沈健程
場地提供：御一空間 R ONE SPACE