早前有讀者向《蘋果》爆料，話的總早前以800元一位，號召至少30部的士喺十‧一掛國旗，由觀塘麗港城駛至中聯辦附近嘅西環水街，然後原路回到觀塘，有傳獲得好多士司機熱烈支持，的總梗係例牌否認，不過噚日八方又真係唔見有的士掛旗，其實的士掛國旗除咗可能無端惹人「私了」外，仲可能俾人篤灰話犯法，第一個教網民「篤灰」嘅人唔係民主派，反而係工聯會鄧家彪！
8.23愛國的士收違例信
鄧家彪日前喺facebook貼咗運輸署嘅信件，話一部喺8月23日參與掛國旗行動嘅的士疑遭人投訴，運輸署收到投訴話的士涉嫌違反交通條例，要求車主回覆並安排驗車，信件指，部的士疑違反《道路交通（車輛構造及保養）規例》，懷疑車輛在車頭加裝旗幟。
鄧家彪梗係大鬧政府咁做好有問題，不過網民就多謝佢「教路」，原來可以向掛旗的士篤灰，等運輸署用《道路交通（車輛構造及保養）規例》郁呢班的士司機，個個仲話以後見一部篤一部，如果司機有不滿就去搵工聯會同鄧家彪追究。
李八方