金光閃閃的獎牌和過去兩年每月5,000元精英資助只屬個人榮譽，但這些身外物重要性就如那轉送父親的港隊制服，陸俊彥看重的是街頭運動獲公眾認可，年少時他手執滑板、頭頂鴨嘴帽、腳踏平底鞋，在街坊眼中如化外之民；如今滑板與單車、游泳等傳統項目在大型運動會齊名，他認為有助摘去亞洲社會中滑板與街童掛勾的標籤，「滑板喺亞洲相對冷門，外行人唔識，見你玩奧運又代表香港贏獎，人哋咪覺得你成功，多人接觸就慢慢改變形象。」
一吐烏氣的也包括陸俊彥，他自道求學時期「讀唔成書」，畢業後輾轉跟隨任職業司機的父親送貨，又曾修讀攝影文憑當攝影助理，沒有走一條旁人眼中正正常常、循規蹈矩的人生路，親友每次向兩老問及陸俊彥生活，兩人都支吾以對，他自嘲：「班親戚唔知我做緊咩，我阿爸阿媽又唔解釋，感覺我好唔掂。我話踩滑板，又幫人送吓貨，咁送貨即係冇料到啦 。」制度建構下，陸俊彥成為滑板界得獎常客，沉默多年突成親友間茶餘飯後誇獎的話題，「唔係話好巴閉，但人哋終於知道我做緊乜，你冇攞獎，佢哋唔覺得你咩，𠵱家令我阿爸阿媽都有啲面，佢哋好似委屈咗好耐咁。」
東京奧運明年將至，資格賽密鑼緊鼓，三軍未動，糧草先行，陸俊彥不諱言到世界各地出戰奧運計分賽所費不菲，礙於財政問題，征奧前路恐怕有阻滯。談起亞運、亞室運等綜合運動會，他都不以為然說「當體驗吓」。不過奧運於他，意義似乎略有不同，「如果史上第一次奧運我有得企入去，咁我都當贏咗，呢個係滑板嘅歷史，踏足到都夠喇。」