中共建政70周年紀念日前夕，大批親北京人士先後現身香港國際機場，準備坐專機上京面聖贈興，但當中竟然夾雜一個「黑衣人」，無論件恤衫定西裝都係黑色，呢個人就係全國政協常委唐英年。
唐唐呢身全黑裝扮，惹來唔少網民議論紛紛，有人讚佢着得「好合時宜」，有人笑佢係示威者嘅「black bloc」，亦有人話佢政治不正確，叫佢應該着到紅噹噹利是封上京先啱。唐唐話過去幾個月，自己最傷心係見到唔同政見人士互相毆打，無咗過去互相包容嘅尊重，希望大家諗一諗，乜嘢係香港嘅核心價值。有網民就不禁想問一句：「接受唔到立場唔同，亂打人，你係咪講緊我哋嘅香港警察？」
表明上京期間有機會同中央官員見面嘅唐唐，臨上機前亦不忘暗寸林鄭，直指特區政府呢幾個月來嘅表現係「有所不足」，尤其係制訂《逃犯條例》過程中，不論政治評估或者諮詢過程都係做得不足，結果令香港社會去到呢個地步，同時又指大家要畀林鄭更多支持，「鼓勵林鄭更大膽做政策上的措施」，唔通引用《收回土地條例》向地產商收地，就係屬於「大膽」嘅政策？