方力申是香港前游泳代表，曾擁有九項香港游泳紀錄，放下游水做藝人，是游到見到水都怕，但為慈善下月初「處男下海」圍繞香港島游一周，時隔15年再練水，辛苦，不過39歲的他希望藉此證明自己仍然有魄力：「我想做一件值得人哋支持我嘅事。」做藝人，方力申認為是被動，做運動則只要今天成績好過昨天，就是已經有進步，單純得多。
方力申相隔15年再度挑戰自己，落海游水，日前他在上環接受專訪時坦言不想認老，但體能真的大不如前，「以前攰，你都覺得自己捱到，𠵱家唞即係等兩個字：『收皮』，個人係完全冇電又好肚餓。游17公里嗰日，我有啲脫水自己都唔知，𠵱家落水嗰陣，每個鐘就要食嘢飲水，薯仔湯、薯茸呢類單糖（monosaccharides）食物補充。」他表示「圍港游」期間，不能休息、不能扶任何東西，連進食也要邊踢水邊食，對於生理及心理狀態，都是很高強度的耐力測試。
游水唔輸得
轉型做藝人已經20個年頭，方力申坦言做藝人太被動，對於工作有點惘然：「做藝人，你唔知點樣可以做得更好，點樣可以令成績更好，你唔知做完有乜回報。做運動單純好多，你知道只要快過噚日就係有進步，回報好易掌握。」做藝人，方力申自言好勝心不夠強：「好多嘢我都冇所謂，就算做運動，跑步、打籃球，我都唔介意輸贏，唯獨游水真係有好勝心。𠵱家個游水教練細我十幾年，唔知點解都好想游得快過佢，明知自己未準備好，都好想快啲。喂，咁我以前叻，𠵱家冇理由唔得㗎嘛。」
談到為點滴是生命籌款的「圍港游」，方力申指：「07年做佢哋嘅大使到𠵱家，上年呢個機構20周年，我哋每位大使都自發地想做啲嘢幫手籌款。我以前都搞過藝人慈善活動，將藝人畫嘅畫、影嘅相、手作仔拎去義賣，今次我想做難啲嘅嘢。」他笑謂可以選擇一個月減20磅晒腹肌，也可以選擇一口氣食十個漢堡包，但這次想更有意義及值得別人捐錢支持的事，對於前游泳健將來說，挑戰「圍港游」似乎是最佳選擇。
歐鎧淳陪游
29歲那年，方力申曾經跑過人生唯一一次馬拉松，11年後，他挑戰「圍港游」：「全程45公里左右，長過馬拉松少少，如果我游到個馬拉松都幾叻仔呀。我想話畀人知，我唔係運動員都有魄力，我唔認老，自己又係土生土長香港人，咁就喺邊度落水邊度上水，呢件事會令我畢生難忘。」但是曾經最叻游泳的他，15年來從未有認真游水：「去旅行落水拍吓片、影吓相就會。嗰時我見到水就驚，但係當我跟佢哋去探訪，見到好多人冇水仲驚。呢啲事令我好感恩，更加想去幫人同埋做人善良啲，所以就促成呢個諗法。」
為了籌得目標數字450萬元，方力申會碌盡人情卡：「我會叫啲有錢朋友支持。」你爸爸？「佢唔得啦。藝人朋友又好難叫佢哋捐錢，Paco（黃柏高）我就會叫，家庭醫生都好支持我，唔收我錢，送咗包暈浪丸畀我，哈。」他將有四名陪游打氣員，包括邀請了歐鎧淳：「我仲諗住拖埋細佬落水，一齊感受吓個維港有幾污糟、啲浪有幾大咁囉。」
撰文：盧妹
攝影：仇志德
化妝：Yen Lai
髮型：Vince Pang Of IL Colpo Playinum TST
場地提供：AKVO Hotel