上周六中乙聯賽吉林百嘉主場對西安大興崇德收官戰中，一名身穿藍色主場球衣嘅大肥佬球員準備開角球嘅相成為網上熱話，唔少網民都想知呢位目測有200磅嘅肥佬係點樣做到職業球員，更有人估呢位超磅球員就係球隊老闆徐廣楠。不過吉林百嘉喺早兩輪聯賽被爆拖糧，有百嘉球員喺賽後拉橫額，話球會領導拖糧，令球員維持唔到生計。唔通係因為老闆冇糧出，搞到要自己親自落場？
冇錢出糧球員罷踢
超重球員見唔少，最出名梗係已退役巴西前鋒朗拿度；仲有兩年前一戰成名、喺英足盃對阿仙奴嘅瑟頓聯「食批門將」梳爾。喺上周六，網上有人發佈咗中乙聯賽有個200磅吉林百嘉球員開角球嘅相，網民就迅速起底，估計呢位中乙肥佬應該係球隊吉林百嘉嘅老闆之一徐廣楠。徐廣楠係2015年吉林百嘉成立嘅其中一位投資人，熱愛足球嘅佢上季仲登記埋成為球員，得閒可以過吓波癮。佢喺上季嘅第一輪比賽已經試過喺主場後備上陣，當時主場球迷都相當識做，拍爛手掌支持呢位超磅老闆。
今場係中乙嘅收官戰，網民估計，因為吉林百嘉已經護級成功，所以喺呢場無關痛癢嘅比賽畀老闆落場玩吓。不過有網民爆料話其實係球隊拖糧問題嚴重，今場只有13個球員願意比賽，當中更有三位係門將，搞到老闆要親自落場。早喺兩輪聯賽前，百嘉主場對青島紅獅護級成功後，百嘉球員集體拉出橫額，話球會言而無信，啲糧一拖再拖，令球員無法生活。
申鑫財困季尾解散
中國球會拖糧嘅問題一向嚴重，中乙更係重災區。由於聯賽關注度低，唔易搵到贊助商，老闆投資完又發覺唔係好賺到錢，唔想再投放資源落去，令到唔少球會都出現拖欠薪金嘅問題。上年就有兩支中乙球會瀋陽東進同安徽合肥桂冠因欠薪被足協DQ，而今季亦有多支中乙球隊被爆出拖糧。
另外，曾經征戰中超六年嘅上海申鑫，喺15年賽季降班到中甲後，近日亦提早三輪宣佈護級失敗，下季要喺中乙作賽。更慘嘅係，有報道指上海申鑫同樣有資金問題，球隊下季可能連中乙都唔踢，喺今季完結後直接解散。