皇家馬德里喺上星期六上演嘅同市打吡，同主場嘅馬德里體育會互交白卷，各得一分，今季保持不敗嘅皇馬喺西甲續居榜首。皇馬今場控球權較多，攻勢亦較馬體會多，馬體會以開波八分鐘祖奧菲歷斯嘅射門為最佳機會，但佢單刀射斜，皇馬則有加里夫巴利屢次失機，雙方半場踢成0:0。換邊後局勢依舊，皇馬始終未能破網，門將奧比歷則係馬體會今場不失球嘅關鍵，當中包括喺75分鐘撲出賓施馬嘅頭槌，最後兩隊賽和0:0。
皇馬目前以7戰4勝3和得15分續居榜首，領先同日喺主場以1:0小勝雷加利斯嘅CF格蘭納達1分，馬體會亦落後皇馬1分續居第3，以2:0戰勝基達菲嘅巴塞隆拿以13分排第4。
