上星期四特首林鄭月娥喺伊利沙伯體育館搞社區對話，當時有市民發言話，前特首老董同689都獲中共邀請出席建政70周年慶典，但林鄭就冇份，因為連習近平都恥與佢為伍。不過政府噚日出稿，原來777都有份去，但行程有啲奇怪，就係佢坐飛機回程唔係直飛香港，唔通驚幾萬港人「和你塞」接佢機？
留低張建宗頂
港府噚日發新聞稿，話林鄭月娥今日率領由香港各界人士組成、超過240人嘅代表團前往北京，「參加慶祝中華人民共和國成立70周年活動」，而777就會喺10月1日先返香港。全世界都知十．一當日由升旗禮開始，全日有網民號召嘅「慶祝活動」，民陣仲喺十．一下午係維園發起集會及遊行，由維園行到中環遮打道，雖然警方發咗反對通知書，但民陣已申請上訴。十．一咁多「慶祝活動」，但777自己就走上北京冇眼睇，留低做署理特首嘅張建宗頂。
最神奇嘅係，新聞稿特別提到777當日黃昏經深圳返港，以往特首上京，梗係直飛北京，再由北京直飛返港，為乜今次要先去深圳再返香港？好多網民估777怕有幾萬、甚至十幾萬人去機場接佢機，到時全民和你塞機場、隨時要封機場就大件事！但先去深圳就唔同，大把路線返香港，又可以選擇先去粉嶺別墅避一避，過咗十．一先返禮賓府又得，講到尾又係怕面對民意。
李八方