日前立法會議員何君堯同一班自稱「愛香港文化藝術工作者」，將《願榮光歸香港》改成撐警歌詞，自己仲親自領唱，結果首歌俾網民report侵權而喺YouTube下架，仲要俾網民恥笑藍絲冇腦，只識偷同抄人哋嘢，亦有人質疑何係「執葉律師」，冇理由唔知咁做係侵犯版權，算唔算知法犯法？
搞出呢件醜事，連條片都冇埋，作為領唱好威威嘅何君堯就真係威，佢前晚喺facebook開直播，第一件事梗係光速割席，話成單嘢係「朋友」搞嘅，係有「朋友」認為要有個「光榮版」，之後就由「朋友」製作咗呢條片，又話唔清楚點係侵權，聲稱歌曲本身冇登記版權、作曲人身份冇確認，所以佢「朋友」拎嚟再填詞冇問題，只係二次創作。
但YouTube喺下架解釋中，已講明條片含有Goomusic版權內容，且對方已因版權因素封鎖影片，而Goomusic正係由歌手何韻詩創立，屬獨立音樂品牌，即係唔係何君堯所講冇版權喎！不過何「執葉律師」亦戴晒頭盔，講明成單嘢唔關佢事，係佢「朋友」嘅事，有乜事就入佢「朋友」數啦，而佢本人就已飛去北京出席中共建政70年活動。