兜兜轉轉上上落落，海俊傑又回到原來，像25年前得了新秀冠軍之後一樣，進入錄音室唱新歌；不一樣的，已經不是當年那個新人，而是46歲的中佬，不過有四分一英國血統的海俊傑，樣貌身形依然保持十足。
「我本人比較有少少old school，嗰啲震音比較多呀，比較舊派嘅唱法，但係𠵱家唱番一啲新曲，唱法係會有轉變，有少少新啲嘅new style！」
以為他久疏戰陣？不是。需知道他到北京發展近十年間，最初有整整一年時間就是靠南下唱酒吧騷維持生計的，唱歌對他而言，既是搵食本錢也是興趣初心。
去年和在北京認識的化妝師老婆雙雙回流香港定居，海俊傑簽約新經理人公司準備回歸樂壇，「今次返嚟香港，最開心梗係做歌啦，再拍番香港嘅電視劇，其次就係食香港嘅食物，我好鍾意食魚蛋粉呀牛腩粉呀碟頭飯呀，呢啲最basic我就最鍾意，煎釀三寶呢啲小食！」
回到原來，還是覺得香港可愛。
撰文：文嘉龍
攝影：沈健程
細個嗰陣梗係曳啦
海俊傑說，這次「回歸」有不少熟悉面孔重逢，像到港台宣傳就遇見淑梅姐（車淑梅），當年他拿了新秀冠軍後的訪問，就是到車淑梅的電台節目；又像這天去訪問地點的途中，也撞見他簽華星前的第一個唱片公司老闆Ricky Fung（前百代唱片總經理馮添枝）。
說回歸或復出，他說越諗越不對路。「最早期我哋嘅idea諗住叫『海俊傑回歸樂壇』或者『海俊傑復出樂壇』，但係諗諗吓唔係好對路喎，海俊傑復出樂壇或者回歸樂壇，又唔係張國榮《Final Encounter》（告別樂壇最後一張唱片）咁有型咁樣《風再起時》！To be honest𠵱家有啲年輕嘅小朋友呢，我又離開咗咁耐，舊嘅嘢佢哋未必睇過比較陌生，如果話海俊傑復出樂壇好似唔係咁吸引，咁不如唔好用呢個topic，我同Eric Kwok（監製）研究過第一隻歌出街，想同我自己嘅自身、自己嘅故事有少少關連。」
他為新歌內容寫下了大綱，交給填詞的林若寧，《長大》就此出世。海俊傑說，公司同事一睇完歌詞，異口同聲說：「咦，咪係你嚟㗎囉！」隨口幾句的歌詞「曾太自我無知的我未知我是儍，大概人成熟了才容易怯懦，而我是我年輕的錯全部看清楚」說中了海俊傑的心聲。
年輕的錯，「絕對有啦，做華星唱片嗰陣，我好犀利，人哋係過千張唱片，我係一千零一張唱片，一張唱片。點解唔再唱歌？好坦白，因為細個嗰陣梗係曳啦，唔係好聽唱片公司講嘢，收咗工又唔係乖乖咁去做音樂，去玩啦去蒲啦，呢啲年輕嘅時候會做嘅嘢！唱片公司見到就會覺得呢個小朋友唔係好聽話！」
海俊傑是94年新秀冠軍，他下一屆的冠軍是陳奕迅。「一屆新秀下一屆又嚟，我記得我曾經入過去華星同老闆講，老闆呀，我下一張唱片點呀？高層又冇直接講雪藏你嘅，只不過佢會同你講，你睇吓我啲poster，嗱，新一屆新秀陳奕迅就出咗嚟，我哋會同佢出先，你睇吓楊千嬅同埋Josie（何超儀）又簽咗喇，咁所以你都要排㗎，你等等先！一等就等咗三年，三年喎，其實都知道唱片公司唔想同我做，又唔可以怪佢哋，因為都係自己唔聽話，但係當時唔係咁諗，當時梗係話點解唔做我呀，我又唱得好、外形又幾好，點解唔做呢！年輕時候永遠唔識諗，只會永遠埋怨人哋，覺得人哋唔好，但係唔會（識）諗，人哋唔再投資喺你身上係有原因嘅。」
婚姻結咗就唔好End
成為「一碟歌手」等運到，海俊傑轉戰拍電視劇，「我第一個劇集都係做主角，同古巨基基仔，係小青姐（梅小青）嘅電視劇《總有出頭天》，你可以睇到我個歷史係由開頭唱片都係萬千寵愛在一身，電視劇第一套都雙男主角同基仔，但係一路落嚟呢，唱片冇喇，電視劇又開始去到二、三（線），甚至乎之後開始去做反派喇，當然角色係幾好玩，但係會知道嗰個轉變，係開始走緊下坡。𠵱家回想番，可能係我條命嘅必經之路，過去就過去咗，𠵱家呢，識得珍惜喇，𠵱家有呢個機會好開心好高興，可以再做番新歌，呢幾日我再做番宣傳嘅時候，嘩，直頭係回到以前嘅華星年代咁樣，周圍跑嚟跑去做宣傳，係好高興嘅！」
此路不通，惟有另找出路，海俊傑輾轉浮沉，08年決定到北京發展，當時他以為有機會拍西片，結果又事與願違。「當時其實準備簽一個經理人，香港人嚟嘅，佢喺上面已經好多年，佢話有一部電影接咗，係一部西片，泰國導演，王敏德個哥哥做男主角，男主角一號，羅素，好高大威猛嗰個，我就做佢細佬，上到去北京見埋導演，個導演喺泰國飛過嚟，劇本齊晒，但係遲遲都唔開，直到等咗成年都開唔到。」
北京天大地大，等足一年冇工開，說好的西片因為資金問題開不成，「坐吓坐吓咁就一年，嗰一年其實都好辛苦，第一，隻身上到去朋友又唔多，可以叫做人生路不熟。北京地方好大，每日做嘅嘢只可以做到兩件事，如果東面做一件事，西面又要做一件事，已經occupy咗你一日嘅時間，北京又塞車，唔同香港，尖沙嘴旺角跟住銅鑼灣跟住中環，一日可以做好多嘢，仲有沙塵啦，自己朋友唔多唔係好慣，直至我遇到我太太，因為佢喺北京嘅朋友比較多，開始慢慢識番多啲朋友。」
那一年白等的日子，好在有商演的中間人安排接騷，海俊傑到廣東省唱騷維生，之後更漸漸有拍戲機會，密密接了不少網絡電影。最感激當然是遇上化妝師太太Effie，前年兩人在北京結婚，在香港補擺婚宴的伴郎伴娘也同是北漂的彭敬慈和傅穎。
「結婚前個心態係會唔同，始終未結婚，個感覺係女朋友，女朋友會散㗎嘛，始終冇一個名份，好似唔係好solid，但到咗結婚喇，尤其是我結三次㖭，同一年呀不過，係同一個人。所謂結三次，係三月一號我喺澳洲簽紙啦，四月八號喺北京又擺少少（婚宴），到9.15喺香港就最大嘅，同一年裏面做晒，着三次禮服着三次婚紗，所以更加鞏固喇！我會覺得婚姻結咗就唔好end，同埋人都做咗大半世喇，大家嗰個感覺好solid。」
1組戲變38組戲
香港的婚禮更加造就了海俊傑回流的先兆。在婚宴上，海俊傑現場唱出好朋友陳容森（張可頤前男友）為他作的一曲《祝福》，親朋戚友和圈中人都大讚好聽，個個鼓勵他再唱歌。海俊傑說：「台上面唱完隻歌之後，落到嚟親戚朋友呀，圈內圈外都話唱得好好喎，你不如唱返歌。我又諗當晚我請咗咁多嘉賓，有邊個可以幫到我呢，我一諗，我請咗陳欣健喎Uncle Philip，佢又係我以前華星嘅CEO，我就即管打個電話畀佢，我話Uncle Philip我想唱番歌喎，有冇辦法呢，佢話得啦，你下次返嚟香港，我就介紹個朋友畀你識，就係我𠵱家公司個老闆。所以有陣時啲嘢就係咁，你要自己積極主動去做第一步，先可能有其他唔同嘅嘢衍生出嚟！」
打電話「𢱑撈」那刻沒有一點猶豫。「冇乜掙扎，可能個人真係成熟咗長大咗，大膽咗啦或者係，覺得要做嘅就做啦，冇話死啦好驚呀，左諗右諗好耐先去做呢件事。」
這次機會由自己爭取，難得好快成事；但有時候以為機會來了，結果又不似預期，「我喺呢25個年頭裏面，我遇過嘅機會唔算冇，其實我咁多年拍嘅比唱嘅更加多，譬如《功夫足球》我覺得都幾得意，有張衞健、容祖兒呀，咁多star但係效果又未話去到爆；譬如話又有一次我曾經接觸過一套西片《天脈傳奇》，我原本得一組戲，鮑德熹（導演）個得力助手Patrick，一個我好好嘅朋友，係佢介紹嘅，佢話一組戲你拍唔拍，我話拍，點解唔拍呀，呢套投資二千萬美金就已經係1.5億喇咁多年前，可以有機會做到一組戲，我都想去試。」
結果由1組變38組。「後尾somehow有個轉變，佢哋話一組戲有機會變成38組戲，嘩，38組戲喎，直情係有一個角色。其實係某一場戲個演員唔係好聽話，咁就冇用佢，一個新人嚟嘅，咁就用咗我，我係反派裏面最多對白㗎喇，幾好發揮嘅……但係並唔係話成績非常理想，相對之下我有份去參與呢部電影，我攞返嚟嘅嘢，唔係話爆得咁犀利！」
反而《孤男寡女》客串演出令人印象深刻。「我好開心可以拍到杜Sir嘅作品，雖然入面嘅角色唔係話好多（戲份），做師姊鄭秀文個花心男朋友。同埋每年都喺好多唔同嘅台不停重播，變咗好多人都記得呢個角色，俾啲咖喱質埋塊面度，記唔記得呀，角色唔係話好多，但係反應係好，我自己個角色亦相對多人記得囉！」
又如《山村老屍》。「有啲嘢係好奇怪嘅，有時我拍咗一啲唔係好大嘅電影，例如《山村老屍》（吳鎮宇、黎姿合演）即係鬼片啦，上到去國內係個個都知㗎，話好驚呀好恐怖呀你套戲，我話係咩好恐怖咩，即係幾百萬嘅電影但係有好多人知，你拍1.5億，啲人唔係話好知，你拍三百萬嘅，好多人知喎！你話點先係一個標準，係冇乜標準㗎喎！」
【後記】誰是海俊傑
海俊傑為了今次新歌的宣傳，除了在發佈會邀請新秀好友開飯局敍舊之外，也拍了另一條自家宣傳片放上網，題目為「誰是海俊傑」來進行街訪，分別有六張相（黃智賢、雷宇揚、鄭嘉穎、海俊傑、黃秋生、八両金）猜猜我是誰，結果後生的一班當然不知道答案，連估都要估錯係雷宇揚喎！
「呢啲嘢我放得好開，同埋幾好玩呀嗰個『誰是海俊傑』，其實梗係想睇吓有幾多人記得，所以嗰日出嚟嘅result，都係一啲年紀大少少以前睇過我電視劇嘅人會比較多一啲，事實又真係着住校服嘅學生哥呢，真係唔係好認識我，呢個係事實，唔需要去呃人或者去掩飾呀，我覺得識你咪識你囉，唔識你咪唔識你囉，唔識你唔係罪，識你亦都唔代表有啲乜嘢獎項！」
場地提供：漁牧
