9月24日，明年小一派位程序開始，所有今年K3，明年讀小一嘅家長都好緊張咁填表、遞表。記者小G、肥仔K等人親自去心儀小學交表，回報話學校人頭湧湧，大量祖父母/父母在學校交表，好多人有二十分、二十五分在手，肥仔K話：「睇怕我地都係機會渺茫，手上只有零分，要車公賜福至得！」本地小學分官津小、私小、直資小，想入Band 1官津小就要講運。入官津小有經濟利益，因為讀國際幼稚園閒閒地七八千銀（學費加雜費）一個月，入到官津小，享受免費教育，家長負擔少好多，每個月慳番五千，用以供樓，可縮短供樓年期㖭！何樂而不為，只是要入讀Band 1官津小，直情要有中六合彩咁嘅運氣，與幼童讀書成績及IQ以至精靈程度無關。
小YY上年到車公廟求籤，為小女入學求得上上籤，叫左丁山解籤，左丁山話：「掂晒，車公有靈嘅話，一定可以入到第一志願！」小YY邊度敢信晒吖，緊張足一年，周圍搜集學校資訊，預備到處叩門。六月放榜之時，果然中晒，無驚無險順利抽中第一志願小學，小YY成個人跳起，話學校免費，校譽好，又近居所，女兒行路可以返學，夫復何求。
點知一位朋友抽到同校，但係要去名校叩門，卒之入到港島中區女子名校，但係要每朝六點前起床搭校巴過海，都幾辛苦。啲現代家長又時興加入家長群組，議論學校行政，一時埋怨學校功課少，一時埋怨學校課外活動少，又有埋怨其他小學一年級有電腦課程，人地直資學校已教coding初階，但乖女間學校冇！究竟家長想緊乜，真係好難講。朋友Y住在元朗，送子入九龍塘一間小學，每朝五點半起床坐車到美孚，再由美孚搭校巴返學，點解要兒子如此辛苦？朋友Y話：「間學校話冇乜功課，要令學生輕鬆上學吖嘛！」果然又係一位現代父親。點知一路讀，兒子功課一路增加，朋友Y去學校問個究竟，學校話：「徇眾要求，好多家長話我地太少功課！」朋友Y唔忿氣：「明知學校少功課，又要嚟入讀，入咗嘞，就嘈唔夠功課，啲家長究竟想點？」這年頭，學生也可稱為顧客至上，邊個顧客畀錢，就要話事！呢間學校學費過萬，課外活動要另外收錢。另一位家長講，佢個仔被選入足球校隊，高興到瞓唔着，點知家長跟住就收到學校通知，話貴子弟入選校隊，要接受一級足球訓練，由本港/外國球會之足球課程培訓，每月學費4000元，家長為之撞火，乖仔入校隊要每月多交4000蚊？想話唔畀，太太話：「畀啦畀啦，唔好打擊阿仔，又會畀同學唱佢父母孤寒！」